Ki shnong khappud ki dei u Mawpud, donkam eh ban pynpoi shibun ki kam pynroi, ong u MLA

Nongpoh:Ha ka sngi kaba la plie paidbah ia ka Jingkieng iaid kali ka Wah Mariong kaba don ha shnong Umtyrnga, kawei na ki shnong kaba don ha khappud ka Assam bad Meghalaya, u Bah Sosthenes Sohtun, MLA Jirang, u la ong ba ka long kaba donkam eh ia ka sorkar ba kan pynioh ia shibun ki kam pynroi sha ki shnong kiba don ha khappud, namar dei ma ki, kiba long kum ki mawpud na bynta u pud u sam hapdeng ka Meghalaya-Assam bad ban iada na ka jingwan kyntur pud ka Assam.

Ia katei ka Jingkieng kaba la ioh ban plie paidbah myn hynnin ka sngi, ka dei ka Jingkieng kaba la tei lyngba ka skim khappud bad kaba la tip kum ka Inter State Border Area Development Program (ISBADP), kaba la tei lyngba ka ophis DRDA Nongpoh, ha ka jingpynmang pisa kaba la kot haduh T. 25 lak tam bad lyngba katei ka Jingkieng kan sa ai jingmyntoi shibun eh ia ki paidbah ym tang na katei ka shnong, hynrei wat ia ki shnong ba marjan bad katei ka thain hi baroh kawei, namar mynta ki la ioh ban kam da kaba suk na shiliang sha shiliang jong katei ka Wah.

U Bah Sohtun, haba kren sha ki paidbah u la ong ba kum u Nongmihkhmat na Jirang, kaba dei ruh kawei na ki Konstitwensi ha Ri Bhoi kaba don marsyndah bad ka Assam, u sngewkhia eh haba iohi ia ki kam kyntur pud kaba na ka por sha ka por da ka sorkar Assam, namarkata ban iada na ka jingshah kyntur ia u pud u sam, ka donkam ia ka sorkar ba kan pynpoi ia shibun ki shim pynroi sha ki shnong khappud.

“Kum u nongmihkhmat paidbah na katei ka thain, nga la pyrkhat kyrpang na ka bynta ban ialeh ban pynpoi ia shibun ki skim pynroi sha ki shnong khappud, namar nga sngewthuh ba ki paidbah kiba sah ha khappud, ki donkam ia shibun ki skim pynroi na Meghalaya”.

Namarkata, u la kyntu ia ki paidbah kiba sah ha khappud ba ki dei ban iada iala u jong u pud u sam bad ba ki dei ban nangpynheh ia ki kam rep kam riang jong ki, khnang ba ka Assam kan nym nud ban kyntur pud sha Meghalaya. Kiba la sakhi ha katei ka sngi, ki kynthup ia u Bah Victor Rani, MDC Jirang, ka Kong RM Kurbah, DC Ri Bhoi, u Bah BJ Kharshandi, PD ka DRDA, u Bah Bur Khongtongkut, u Bah Mathew Makdoh, Project Economist ka DRDA, lem bad kiwei de ki riew rangbah jong katei ka thain.