Ki sengbhalang ki dei ban shu iarap ia ka Council

Shillong: U Executive Member ka KHADC ba peit ia ka tnad khaii u bah Paul Lyngdoh u la ong ba ki sengbhalang ne kino kino kim dei ban khynra trading license hynrei ki dei ban shu iarap ia ka Council ban pyntip haba ki suba ne don mano mano ba leh ia ki kam khaii beain.        

Kane ka jingkren jong u bah Paul ka long halor ka jingtwad jingtip ia ka jingbthah ka sorkar jylla ba ka Council kam dei phah khynra trading license ia kino kino kynhun hynrei dei ban leh beit tang ka Council kaba la pynkup katkum ka ain.

“Ka jingkhynra trading license kiwei ki kynhun, kan pynioh lad pynban ia kiwei ki jaitbynriew ban ialeh pyrshah ia ka. Ki sengbhalang ne kino kino ki lah ban shu iarap ia ka Council ban shu pyntip haba ki lap ne shem ba don kiba leh kam khaii beain”, la ong u bah Paul.
U la ban jur ba haba don kino kiba suba ba don kiba leh kam khaii, ki sengbhalang ki dei ban pyntip sha ka Council ba kan leh ia kaba donkam katkum ka ain.  
“Kiba iaid khlem ka jingtip ka Council, ka pynkhlain ia kiwei ban ialeh pyrshah. Ka Council ka don ka tnad ha kaba kan nang pynkhlain halor kane kaba la pynkup bor ka ain”, la ong u bah Paul.