Ki nongialam sengbha lang ha ka jingiakren mynta ka sngi bad katto katne ngut ki nongthoh khubor, ki la pynpaw ia ka nongrim ba ki ieng halor ka jingdawa ban pyntreikam ia ka ILP bad kumjuh ruh halor ka nongrim ba la hap ban pynlong da ki jingiakhih.
Na ka liang jong u President ka KSU, u Bah Daniel Khyriem u la ong, ka dei ka jingleh mynthi jong ka sorkar kaba la pynlong ia ki sengbhalang ban pynlong ia ki jingiakhih.
“Ngi ki sengbhalang ngi ai ka jingsngewnguh ia ki paidbah kiba kyrshan ia ka jingiakhih ka jong ngi kaba la neh mynta 2 bnai kynthih ban dawa ia ka ILP bad bun ki peit bad kylli balei ki NGO ki pynlong ia ka jingiakhih ban dawa ia ka ILP bad bun snem ki sengbhalang kila iakhih bad la pyntreikam ia ka inter state worksman Act hynrei kane kala pynbitar ia ki sengbha lang bad ia u paidbah namar ba ka sorkar kam shym la pyntreikam hok ia ka ha kaba yn shym la pynkhlain ia ka tnad Labour ne wat ban thung ia ki 39 ngut ki Labour Inspector haduh mynta bad kane ka pyni shai ba ka sorkar kam long serious halor kane” la ong shuh shuh u bah Daniel.
Une u nongialam ka KSU u la ong ruh ba, ka sorkar kala thaw ia ka HLC on Influx bad haba kane ka kynhun kala ai ia ka recommendation ban pyntreikam ia ka ILP ka sorkar kala aidaw bala jan palat ka elekshon bad ynda la dep ka elekshon ha u bnai April u Cm ym lah ban rai bad ula ai daw ba u hap leit Delhi bad ula kular ban iakynduh ia ki sengbhalang ynda la wan phai hynrei ula iakynduh ia ki nongialam sengbhalang hadien phra bnai bad ha kine ki phra bnai u CM ula wanrah ia ka Tenancy Bill da ka jingthmu ban pynjah ia ka rai bala shim da ka HLC on Influx ban pyntreikam ia ka ILP.
U President ka FKJGP, u bah Joe Marwein u la ong, ki sengbhalang kila dawa ia ka ILP naduh u snem 2011 bad ha kane ka snem ba ka sorkar MUA 1 hapoh ka jingialam u Dr Mukul Sangma ha kaba ki sengbhalang kila pynlong ia ki jingiakhih kiba jai katba nang iaid ki sngi ki snem ban pynkhlain ia kane ka demand bad dei ha u snem 2012 ka sorkar kala thaw ia ka High Level Committee on Influx ha kaba la iadonbynta ki heh sorkar, ki Chief Executive Member jong ki Autonomous District Council, ki Rangbah Shnong,ki nongialam seng bhalang bad haba kane ka kynhun kala iakynduh 5 sien kala shim ia ka rai ban pyntreikam ia ka ILP namar ha kane ka jingiatai la shem ba dei tang ka ILP kaba lah ban tehlakam ia ka Influx, hynrei kaba sngewsih ka long ba ka sorkar kala shu kyntait beit ia kane ka Recommendation jong ka High Level Committee bad kam kwah shuh ban iakynduh ia ki nongialam sengbhalang.
Ha ka sorkar MUA 2 ngi la iakynduh shi sien ia u Dr Mukul bad ula pan por ban study bha ia kane ka Recommendation bad hadien katta u khlem khot shuh ia ki sengbhalang bad u Myntri Rangbah mynta u ong ba ym kwah shuh ban iakren bad ki sengbhalang namar ba ki stick beit ha ka ILP bad na ka liang ka sorkar ngi iohi lehse ba kala shu thok bad lehkai bad ban pynjlan ia ka por ha kaba iadei bad ki sengbhalang da kaba shu pynlong ia kita ki committee, la bynrap u bah Marwein.
” Ha ka state jong ngi ha kito ki por ka don ia ki restriction Areas Permit (RAP) la weng noh ia ka bad ym shym la pyntreikam shuh ia kino kino ki mechanism ban tehlakam ia ka influx bad ki don kiwei kiwei ki ain kiba tlot ki bym lah ban tehlakam ia ka influx, na katta ka daw ki sengbhalang ki dawa ia ka Inner line permit ka ain kaba khlain kaba lah ban iada ia ka jaidbynriew” la ong shuh shuh une u nongialam ka FKJGP.
U la ong ruh ba, ka jylla ka don ia u pud u sam uba jrong bha bad ka Assam bad Bangladesh bad ha NE hi baroh kawei la ker sawdong da kita ki ri Bangladesh, Myanmar, Nepal bad Tiber kine ki ri ki pynmih shibun bah ki Refugees bad kine ki wan rung ha ka thain NE bad haba kila ioh ia ka Indian Citizenship ki ioh ban rung ha Meghalaya da kaba suk bha namar ba ym don shuh kita ki ain kiban tehlakam ia ki bad kane kadei ka jingeh kaba u paidbah u iakynduh bad kaba buh ha ka jingma ia u trai ri trai muluk.
U la ong ruh ba u Mukul ula ong ba ki jylla kiba pyntreikam ia ka ILP ki mad ia ka jingeh halor ka jingwan rung kyrthep ki nongwei ryngkat bad ka jinghiar ki trai ri trai muluk ha ka jingdon paid, Nga kubur ia katta, hynrei ka long pat kumne ba kine ki jylla kiba la mad bha ia kane ka jingeh bad lyngba ka jingioh jngai jong ki nongmihkhmat kila wanrah bad pyntreikam ia ka ILP namar ka jingioh rung laitlan ki nongwei ki trai ri kila shah ktah ha ka khaii ka pateng wat ha ka synshar khaddar ruh hynrei kine ki nongwei haduh mynta ki dang exist hi, Ki Chakmas jong ka Tripura kila kylla long rit paid hala ka ri bad ki Nepali kila synshar ha Sikkim ha kaba ki sikkimese kila kylla long rit paid, Ula ong ruh ba ki jingiakhih kila mih man la ka por namar ka jingwan tuid ki nongwei kiba la buhai shnong bad bat lut ia ki kam khaii pateng bad ki jylla kiba la pyntreikam ia ka ILP mynta kim don jingiakhih shuh kumta donkam ia ka ILP ha Meghalaya ban tehlakam ia ka jingwan rung kyrthep ki nongwei bad ula kyntu ia u CM ban pyntreikam noh ia ka ILP bad ban weng syndon ia ka kyntien Influx na kane ka jylla khnang ba un ioh shongsuk shongshngain.
Na ka liang jong u bah Sadon Blah nogialam ka HNYF, u la ong haba ki sengbhalang kila dawa ILP ka sorkar kala thaw ia ka committee bad haba kane ka committee kala rai ban pyntreikam ia ka ILP u CM u ong ba kadei ka political ploy hapdeng ki ngo,s bad ki political party ban dawa ILP hynrei ha ka por ba thaw ia ka committee u ong ba kam don kano kno ka political connections. Kane kadei tang ka jingthmu ka jongu ban ialam bakla ia u paidbah.
“Ka jingwantuid ki bar jylla ka buh ia ka jaidbynriew ha ka jingma kaba khraw hynrei ki seng sain pyrthei kiba ialeh ban pynheh iala ka vote bank ka long kaba kham ma shuh shuh namar tang ban bha ki politishan bad ki seng sain pyrthei ki kynthoh ia ka ILP ba kan ktah ia ka tourism ban pynkhein ia ki riti synshar paidbah, hynrei ngin leh aiu ia ka roi ka par lada ngi duh iala ka hok bad iala ka identity” la bynrap u bah Blah.
“U mukul u ong ba ka ILP kadei ka ain phareng kaba la rim, u kyntait tang ia ka ILP hynrei ka ILP ka dang don ha kane ka jylla bad ka sorkar kam lah pat ban pyni ia ka Repealling Act jong ka Garo Hills, ka ILP kadei ka ain kaba la rim hynrei lada donkam ban pynthymmai dei ban pynkylla katkum ka jingiaid ka por bad ngi sngewthuh shai ba yn ym lah ban bud thik kumba ka long mynshwa” pynkut kane ka kyrwoh khubor.
Phi don ban ong eiei?