Da U Samla PROPHESOR MAWKON
Information & Publicity Secretary
SSSS East Khasi Hills District.
Ki Seng Samla Shnong ki dei U wei na ki Lai Tylli ki Mawbyrsiew ban Tei ia ka Imlang Sahlang nalor Ki Seng Longkmie bad Ka Dorbar Shnong. Kumta Ki Shnong ki dei ban don beit la ka jong Ka Seng Samla hapoh la ki shnong. Haba ki samla ki khlain ka shnong baroh kawei ka khlain. Haba ki samla ka shnong ki dei kiba tipbriew tipblei kata ka shnong ka long kaba shongsuk shongsain. Haba ki samla ka shnong ki long kiba khlem akor kiba lapmiet ha kiei kiei kiba sniew kata ka shnong ka long kaba khynwin da kiei kiei ki jingsniew.
Mynta kawei ka KRUIN kaba kynrei bha ha ka Jylla jong ngi khamtam hapoh Sor Shillong bad kiwei kiwei ki bynta hapoh ka Jylla jong ngi ka dei U Drug bad ki kynja jingdih pynbuaid. Kumta donkam Ki Seng Samla kiba don bun ki Samla kiba long Ki Nongkit Ktien Syiem/AMBASADOR ban ialeh pyrshah bad ban ioh ban teh lakam ia kane ka Kruin kaba wan ban pynjot ia ki khun samla lud bad ki samla kumjuh ki rangbah hapoh ka shnong ka thaw. Haba Ki Samla ka Shnong ki don ia ka Jingmut kaba Khlain kin lait na kine kiei kiei bad kin kylla long ki Nongnoh Synniang hapoh la ka dong, ka shnong bad ha ka imlang sahlang hi baroh kawei. Mynshem snem ha ka jingrakhe International Day against Drug Abuse and Illicit Trafficking hapoh U Soso Tham Auditorium kata ha ka 26th June 2018 halor ka Theme, “Listen First- Listening to children and youth is the first step to help them grow healthy and safe”, U davies R Marak, SP ka East Khasi Hills District u la ong ia kine ki kyntien kiba kum u Samla nga dap da ka jingsngewkhia kata ba Ka Meghalaya kala kylla long suki suki ka Jaka Sam/pynmih ia ki Drug/Heroin hapoh India (MEGHALAYA SLOWLY EMERGING AS HEROIN DISTRIBUTION CENTRE OF INDIA).Une u Ophisar Rangbah u la ong ruh ba ka Shillong ka la kylla long kata ka Transit Point ha kaba don ruh kiba don ka jingiadei bad ki kam lehnoh bad kiba ia donkti ruh ban leh ia kita ki kam khaii ban bei tyngka ban leh ia kiei kiei sniew har rukom jong ki. Bad ki jingkiew ki kam sniew kiba rit kiba ria ruh dei na ka jingbun kita ki nongdih/nongpyndonkam drok ha kiba bun ki dei ki Samla. U la bynniaw ruh ba bun kiba ngat ha kine ki kam ne jingjia dei kiba wan na ka Ing ba duna jingioh ne kito kiba wan ka longing ba pait ba pra. U la kyntu ruh ban peit bha ia ki samla lud bad ki samla bad ban ialeh pyrshah ia kine ki kam sniew baroh. Na ka liang ki Pulit ki don ban ai awareness ha ki skul ki college bad ha ki dong bapher bapher.
Kumjuh ruh u Dr. Arvind Nongpiur, Asst Professor, Psychiatry Department, NEIGRIHMS ha kaba ai jingkren i la ong ba ka Jingktah U Drug ka la sdang na duh ka rta ba dangrit. Kiba bun kin gat ha ki jingshah pynbor ha kita ki Peer bad katba ki nang rangbah kipoi ha ka kam dih drok kaba pynduh noh ia ki ia KA KOIT KA KHIAH bad KA JINGROI HA KA JINGIM. I la ong ba ka Jingktah U Drok kam dei shuh ka JINGEH HA KA IMLANG SAHLANG (Social Problem) hynrei mynta ka la kylla long KA JINGPANG kaba donkam ia ka Jingsumar ba paka (Proper Medical Intervention). Bad ia kane ka JINGKYRNI DIH DOK (Drug Addiction) lah ban sumar.
Kum ki Samla ngi don ia ka BYNTA kaba khraw ban ialeh ia une u KRUIN BAMPONG ia ki para samla ki heprit jong ngi da kaba ngin im ka jingim kaba lait na kine kiei kiei kiba ktah ia ka KOIT ka KHIAH jong ngi. Da kaba pyni nuksa ia la ki para ki hymmen nyngkong nangta ia kiwei pat ki para samla hapoh la ka dong ka shnong bad ka Imlang ka Sahlang. To Ngin ia kren bad ai mynsiem ia kiwei Ki HEPRIT SAMLA Jongngi ban IM ka Jingim kaba bha kaba don ka THONG ha la ka JINGIM BAN LONG U/KA NONGMUNA U/KA NONGTEI HA LA ING HA LA DONG HA LA SHNONG BAD HA KA IMLANG KA SAHLANG BAD KA RI BAD JAITBYNRIEW.
Kam don Jingmyntoi ban sngew synei namar ba kam lah ban thaw Pyrthei. Kaba Ngi Donkam mynta ka long ban noh Synniang katba lah ban pynbha ia kiwei bad khamtam leilei ha la ka jong ka shnong ka thaw.
kmno ban thoh write up iaka seng Samla shnong