Ki seng sain pyrthei kim dei ban tuklar ia ka jingiakhih ha NEHU, ong u bah Pala

Shillong:U President ka Meghalaya Pradesh Congress Committee (MPCC) u bah Vincent H Pala ula ong ba kam long kaba bha ia ki seng sain pyrthei ban leit pyllong politik ia ka jingiakhih ha NEHU.

Haba kren halor kane ka mat, u bah Pala ula ong ba la don kiba ong ia u ban leit peit ia ka jingiakhih ha NEHU, hynrei ula pyni ba kam long kaba bha ban leit kum ka seng sain pyrthei bad kam bha ban kren eiei shabar ia ka bym sngew tynnad namar ba kan ktah ia ka burom ka NEHU.
Ula ong ba lada ka Congress kan leit peit ia ka jingiakhih ha NEHU, ka BJP kan leit bad kiwei ki seng kin leit, kan kylla kam politik syndon bad kam don shuh ka jinglong khuid.

Katkum ka jingong u bah Pala, ka Congress ka don ka NSUI kaba peit ia ki samla pule, ym ban tuklar da ka party.
Lah ban kdew ba ki samla pule ka Skulbah NEHU ki la pyllong ia ka jingiakhih shah thngan la lai sngi eiei mynta ban dawa weng ia u Vice Chancellor uba la pyneh ia ka jingdawa jongki, ban weng noh ia u Registrar bad u Deputy Registrar.