Ki riewlum ki lait ban siew khajna tang ha jylla lajong

Shillong: Ki riewlum kin lait na ka jingshah siewkhajna ia ka kamai jongki tang lada ki trei bad ioh kamai na ka jylla jong ki hi hynrei lada kin leit shabar ne treikam shabar kin hap ban siew ia ka khajna kamai jong ki.

Ia kane la pynshai da u ophisar na ka tnad Income tax ha ka jingiathir kaba la long mynta ka sngi ba la pynlong da ka Press Bureau of Information (PIB) Shillong.

Haba kren ha kane ka jingiathir, u Anil Bhardwaj, u Addl. Commissioner, Income Tax u la ong b ba katkum ka kyndon 10(26) ka Income-tax Act, ka la pynlait ia ki riewlum ban lait na ka jingshah siew khajna haba ki trei ha ki jaka ba la pynhap kyrpang ka ain.

“Ka jingpynlait khajna kam mut pat ba la shu pynlait rynghang beit hynrei ka donkam ia ki ban pyntip ban ai jingthoh ban pynshisha ba kim dei ban shah shim khajna”, u la ong bad bynrap, “Ka jingpynlait khajna ka dei beit tang ha ka kyrteng jong u briew shimet ym ha ka kyrteng ka kynhun ne ka kompeni”.

Hynrei u la kren shai ba kito ki riewlum kiba kamai bad trei shabar, kim lah ban lait na ka jingshah siew khajna namar ba ka ain ka kren kumta.

Ha kane ka sngi, u Bhardwai u la pynshai ruh ba Benami Transactions (Prohibition) Amendment Act, 2016 kaba la mana bad pynshitom ia ki briew kiba leh ia kano kano kam ha ka kyrteng kiwei pat.

Shwa ia kane, haba kren ha kane ka jingpynshai, u Ronmoy Das na ka Income Tax u la ong ba kane ka jingpynlait khajna ia ki iew lum ka dei katkum ki kyndon ba la don ha ka Income Tax Act.

U la ong ba ka Supreme Court ka la ai ia ka rai dang shen ba kito ki riewlum kiba pynlait na ka jingsiew khajna ki dei ban pynshisha ia ki daw ba ki dei ban shah pynlait.

Hynrei u la ong ba katkum ka kyndon ka Income Tax, kito ki riewlum kiba kamai shabar na la ka jaka, kim lah ban lait na ka jingsiew khajna. U la ong ba ka jingpynlait khajna ka dei beit ha ka kyrteng jong u riew shimet ym ha ka kyrteng jong kano kano ka kynhun.

Ha kane ka jingpynshai, la ioh ruh ia ka jingkren na ki ophisar ka Income Tax kiba la pynshai thikna halor kane bad kumjuh u bah Allantry F Dkhar uba dei u nongialam ka UDP nalor ki nongthoh khubor bad ia ka jingiathir la pyniaid da u president ka Shillong Press Club u bah David Laitphlang.