Ki riew thor ruh ki dei ki nong Meghalaya, ym iahap u nong bishar barim

Shillong:Ka Wans Bros Publications ha ryng kat ka jingia treilang bad ka kot khu bor U Rupang myn hynnin ka sngi ka la pyllait paidbah ia ka kot ba la ai kyrteng “Ka Ri Jong Ngi Mynwei bad Mynta” kaba long ka kot ban kyrsiew ia la ki para ri, ia kane ka kot la thoh da u Bah Spiton Kharakor ia kaba na ka liang jong u nongpynmih ia kane ka kot u Bah P.R Shabong uba lum la lang na ki artikil kiba u bah Spiton u la noh synniang lyngba ki kot khubor Khasi bapher bapher.

Ia kane ka kot la pyllait paidbah da u Bah Herman Nongrum uba la shongthait na ka kam kum u Register jong ka Guahati High Court kum u kongsan, ha kaba kren ha kane ka sngi u bah Herman u ong ba u Bah Spiton u long u riew rangbah uba iohi jngai ia ka mynta bad ka lawei jong ka ri bad ba u dei ruh u riew ieid ri uba la noh synniang sha ka imlang ka sahlang jong ka jaitbynriew lyngba ki artikil ba la pynmih ha kiba bun ki kot khubor Khasi. U iathuh ruh ba kum u riew rangbah u ju ia don bynta ha kaba rakhe ia u snem thymmai (New Year’s Day) jong ki Khasi manla u snem ia kaba mynta u snem la rakhe ha ka 15 tarik u Naiwieng ha Riti Academy, namar u iathuh ba u Khasi u don la ka jong ka rukom khein sngi khein ia kaba iapher na ka almanac ki phareng.

Shuh shuh u Bah Herman kum uwei na ki riew rangbah u iathuh ba ka jingsdang bun ban wan buhai shnong jong ki briew ba nabar jylla ka la sdang ha ka por jong ka jingsynshar jong ki phareng kata naduh ki snem 1863 ter ter bad kaba dang iai bteng kat haduh kine ki sngi. U pynpaw ruh ia ka jingbynniaw halor ka jingbym leh eiei ka sorkar ban ieng pyrshah ia ka jingpyntip ba la shim da ka sorkar India ban ong ba ki riewthor ruh ki dei ki nongshong shnong jong ka Meghalaya.

Ha ka jingkren jong u bah Spiton u la iathuh ba shwa ban pynmih ia kane ka kot u la pynmih shaw ar tylli ki kot ia kaba u la ai kyrteng “Ki Khun Ki Ksiew u Hynniew Trep” bad kawei pat “Ban Iai Sah Kynmaw, ula ong ba hadien ba u la pynmih ia katei ka kot u la pyrkhat ban nym thoh ne pynmih kot shuh hynrei ban shu noh synniang sha ka jaitbynriew lyngba ki artikil ha ki kot khubor Khasi.

Nalor u kongsan bad u nongthoh ha kane ka sngi la ioh ruh ia ka jingkren na u Bah S.S. Majaw uba la peit bniah ha shwa ban pynmih ia kane ka kot bad kumjuh ruh na u Bah R.M. Shabong Editor jong ka kot khubor U Rupang uba la pynkup burom ruh ia une u riew rangbah.