Bah RM Shabong
Ka elekshon sha ka Khasi District Council, ka dang shu dep bad ka la long ka jingialynguh kaba jur ha ki rynsan bapher, lada dei ha ki rynsan jong ki seng sain pyrthei ne ha ki rynsan synrop jong ki kyrtong bapher, kiba kham jia ha ki jaka sor bad katei ka dei ka rukom ban ia pynksan ialade, na ka bynta ban jop ha ka jingialeh.
Katba ka jia, khlem da iakren halor ka jingsngew sain pyrthei, ngi iohi ba ki don ki kyrtong, kiba la dei ban wan sha ka iing dorbar jong ka District Council, kiba kynthup ia U bah George B Lyngdoh, uwei na ki riewshemphang jong ka Ribhoi, uba la long teng U MLA jong ka Umroi Constituency ha ki snem 2018 haduh 2023 bad utei u rangbah, kum u dkhot jong ka iing dorbar, ula phalup ia ki ishu bapher jong ka Constituency bad ka jylla hi baroh lang.
U bah PN Syiem, uba dei U MLA bad MDC barim jong ka Mawsynram bad nangta jong ka Mawkhar Pynthorumkhrah, u dei sa uwei u snar, uba tip bha ia ki kyndon ain bapher kiba ia tyngkhuh bad ka District Council bad u dei utei ruh u rangbah, uba iakhun pyrshah ia ka ain bam ar maloi jong U Mukul Sangma bad kumjuh ia ka ain pynduh bor ia ki dorbar shnong, ha ki snem 2015-16 bad khlem pep, u dei utei u rangbah, uba thir jlih bha ia ki ain thymmai jong ka District Council, ha ki khyndiat bnai ba ladep, lada dei ia ka ain ban teh song ia ka jingshim jait sha ka kmie bad nangta, ka ain kaba ai bor ia ki dorbar shnong, nalor kiwei pat.
Nangta sa U bah Bindo M Lanong, uwei na ki MDC, uba la rim tam jong ka Khasi District Council, ha kaba ula mihkhmat haduh 7 sien lynter, kaba kynthup ia 6 sien, da kaba shu ialeh elekshon bad sa shisien, da kaba shu sieh U Lat ka jylla bad utei u rangbah, u sdang ban rung ha ka Council, naduh u snem 1972 haduh kaba kut jong kane ka dorbar jong u snem 2025. U Bah Bindo, um dei tang u nongiatai uba tbit, hynrei, u dei ruh uba nang ban pynsting ia ka jabieng jong ki MDC, da ki jingkren ba pynphuh samrkhie ha ki khep ki khep bad kaba nga kynmaw ka long, ba u da sei shisha ia ka sap iatainia jongu, ha ka por, ba ki iadon lang hapoh dorbar bad U bah HS Shylla (ba la khlad noh).
U Bah MN Mukhim, u dei sa uwei pat u riew rangbah, uba ngam bha ha ka politics jong ka jylla, naduh ka por jong ka jingialeh ia ka jylla rilum bad utei u rangbah, ula long MLA bunsien bad ula long ruh U MDC, la bunsien bad u dei uwei na ki nongialam barim jong ka seng PDIC, nangta, ula don lang bad ka UDP bad ha ka sien ba ladep, ula long U MDC jong ka seng riewlum HSPDP, ha kaba ula mihkhmat na Dienglieng Constituency bad utei u rangbah, um shym la iakhun shuh ia ka elekshon MDC, kaba dang shu long ha u bnai rymphang ba ladep.
Kawei kaba pynpyrkhat, ba kane ka elekshon, kaba dang shu dep, ka long ba ka duh noh ia ka jingmut jongka, namar ba la iohi, ba kiba bun ki seng sain pyrthei, ki kren ia ki kam pynroi pynban, ha ka jaka, ba kin kren ia ka dustur riti jong u khun khasi, ha kaba ka Council, ka dei ban pynneh bad ia katei la iohi, ba kat ka kyrdan nongialam jong U bah Prestone Tynsong, uba dei u heh jong ka sorkar jylla, u leit pynbna pynban, ban pynkylla Police Bazaar ia ka Pynursla. Um dei tang utei u rangbah, hynrei, ki don sa shibun kiwei de ki kyrtong, kiba iakren ia ka skhim surok, skhim um, skhim shna iing, lada kin jop kum ki MDC bad kam dei tang katta, la iohi ruh, ba ki don hi ki MDC, kiba leit pynbiej ia ki nongthep vote, ha shwa ka elekshon, da kaba ki sam tin, sam top syntex, sam tyrpa bad kiwei kiwei, kiba long shabar ka jingmut jong ka Council.
Ka don sa kawei ka mat, kaba hap ban iakren bad kata ka long, ba ki don ki kyrtong seng sain pyrthei, kiba iakhun ia kane ka elekshon MDC, da kaba pynlut da ki bun bun klur tyngka bad ka jingkylli, ka long ba kaei ka jingmut kaba don ha kitei ki jait kyrtong, haba ka tulop jong U MDC shibnai, kan long kumba T.1lak antad bad lada jia ba um pynlut shaei shaei ruh, kumta ha ka san snem, un ioh ban pynlong tang kumba T.60lak bad kumta, kitei kiba pynlut da ki klur, ka thew shai, ba kin da jop ia katei ka elekshon, kim thew satia ban ioh leit mihkhmat sha District Council, hynrei, ba kin pyndonkam ia ka muhor jong ka jinglong MDC, na bynta ba kin kamai spah ialade bad pynmih baiduh, ia katei ka klur kaba ki la bet sha ki nongthep vote.
Ka elekshon sha ki ar tylli ki District Council, ka long kaba noh shiliang, namar ba ha Khasi District Council, kaba don 29 tylli ki MLA Constituency bad ka don hi 29 tylli ki MDC Constituency, katba ha Jaintia hills, kaba don 7 tylli ki MLA Constituency bad ka don hi 29 tylli ki MDC Constituency bad uba jop ha Mawlai Constituency, kaba dei kawei na ki Constituency kaba bun briew bha, u ioh haduh 22619 vote, katba uba jop ha Jowai North, uba ioh vote bun eh, u ioh da 6234 vote bad katei ka pyni ba ka jing iaphiah Constituency hapdeng ka Khasi bad ka Jaintia District Council, kam ia ryngkat shuh satia, ha kitei ki ar tylli ki Council.
Phi don ban ong eiei?