Ki riew donsap, ha ka ia rkhie kynkiak

Shillong, 1 Naitung:
Ka kynhun jong ki riewdonsap na Nongbah Shillong hapoh jong ka shab jong ka MRs productions ka la pynlong ka jingrakhe ia ka World Jokes Day ha ka 1tarik Naitung, 2016 da kaba pyninam da ki sawangka biria kiba lyngkot ryngkat bad katto katne ki jingrwai. Wat la ka rong ka taw ka dei halor ka biria ka danda, hynrei ki don ruh ryngkat bad ki jingsneng bad khubor babha na ka bynta ki paidbah. La wer sngewbha ruh ia ki paidbah ban iathuh khana biria ha kaba katto katne ki la leh danda bad iathuh khana biria.
Kum shi bynta ban kyntiew ia ki kaitor bad myllung ba rwai ki jingrwai bad sur tynrai, la thmu ban wanlam ia ka kynhun na Wahkaji, Krem Lamet Traditional Art and Cultural Organisation, ha kaba ki la pyninam artat ia kawei na ki jingtem kiba ym pat ju iohi mynno mynno ruh ha ka imlang sahlang naduh ki por barim. Ka kongsan Dr Streamlet Dkhar, Head, Department of Khasi, North Eastern Hill University ka la kren shitrhem ban kyntiew kum ia kine ki jingpyrshang.