Nongpoh: U Bah Sosthenes Sohtun, MLA ka Jirang, uba lah ruh ban ong ba u dei u Nong mihkhmat, uba hap ban peit ia kiba bun ki shnong kiba don ha syndah eh bad ka Assam, u la kyntu ia baroh ki nongialam shnong kiba don ha khappud bad ka Assam, ba ki dei ban long kiba pyrkhing bha ia ka rung ka mih ki briew nabar.
U Bah Sosthenes Sohtun, u la ong ruh ba ha kaba kum kane ka por, ki rangbah shnong ki dei kiwei na kiba iarap ia ka sorkar, na ka bynta ban khanglad ia ka jingsaphriang u khniang jingpang COVID-19, namar tang ki briew sorkar kim lah shuh ban leh ei ei khlem da don ka jingiatreilang bad ki Rangbah shnong, namarkata ka long kaba donkam ia ki rangbah shnong ban pyrkhing ia ka rung ka mih ki briew kiba nabar jylla, khamtam ha ka por ba ki thmu ban rung sha ki shnong ki thaw khlem da ioh ia kino kino ki jingbit na ka sorkar.
Na ka jingkren utei u MLA sha ki lad Pathaikhubor, la sngewthuh ba ka nongrim kaba la pynlong ia u ba u kyntu ia ki rangbah shnong ba kin pyrkhing ia ka jingwanrung ki briew nabar, ka dei namar ba ka Jirang Constituency, ka dei kaba iajan eh bad ka Assam bad kaba suk ia ki briew na Meghalaya-Assam bad kin lehtuh da kaba rung ban mih na kawei sha kawei ka jylla, khlem da ioh jingbit.
Namatakata, na ka bynta ban wanrah ia ka jingjop ha kane ka jingiakhun pyrshah ia ka khlam COVID-19, u MLA ka Jirang, u la kyntu ia baroh ki nongialam shnong ba kin ai ka jingiatreilang bad ka sorkar, kata da kaba pyrkhing bha ia ka rung ka mih ki briew ha ki shnong ki thaw khamtam ha ki shnong khappud bad ruh ba ki dei ban pyntip sha ki briew ka ain, lada don ki briew kiba leh pyrshah. Ha kawei pat ka liang, utei u MLA ka Jirang, u la kyntu ruh ia kito ki samla kiba dang shu wanphai na kiwei ki jylla, ba ki dei ban kohnguh bad bud beit ia ki jingbthah jong ka sorkar jylla, khnang ba kane ka jingiakhun pyrshah ban lait na ka jingpur ka khlam Coronavirus kan long kaba jop.
Phi don ban ong eiei?