Ki pulit Meghalaya, kim shym pynkhreh halor ka Lapangap, ong u bah Paul

Shillong:U nongaiktien ka sorkar MDA-2, u bah Paul Lyngdoh u la ong ba ka jingkynriah noh ki pulit ka Meghalaya, na jaka ha thain Lapangap hadien ba la shah pynbor ha ki Karbi, ka dei na ka jingbym long pynkhreh ba kan mih ka jingjia kynsan bad na kane ka daw, ki hap ban kynriah noh.

Haba kren mynta ka sngi, u bah Paul ula ong ba katkum ka jingtip jong u, ka la don ka jingiakynad hapdeng ki ar ki jaitbynriew bad ka la don ruh ka jingpynshit na ki katto katne ngut ba kine ki ar jait bynriew kin iakynad.
“Ha ka jingshisha, katkum ka jingtip, ka don ka jingiakynad hapdeng ki ar jait bynriew bad don ruh kiba pynshit da ki katto katne ngut ba kine ki ar jait bynriew kin iakynad ban poi sha ka jingmynsaw”, la ong u bah Paul.
U la bynrap, “Ha kaba iadei bad ki pulit ka Meghalaya, la ioh jingtip na ka tnad pulit ba ki pulit kim mutdur, kim long pynkhreh ban mih ka jingjia, ki la shu kynduh kynsan ia ka jingjia bad namar ba kim long pynkhreh, ki hap ban shu kynriah”, la ong u bah Paul. Lah ban kdew ba ha ka video ba la saphriang, ki pulit ka Meghalaya ki phet noh hadien ba la shah siat da ki jri siat sim ha ki Karbi ha thain Lapangap dang shen hadien ba ka la mih ka jingiakynad na ka jingiaknieh jaka ha katei ka thain khappud.

Ha kajuh ka por, u la ong ba ka jingjia ha khappud ka shong ha ki jaka bad ha bynta ka west khasi, ka long jai jai namar ba la ai ia ka khubor kaba shai bha ba dang iakren iakane ka kam. U la ong ba ka jngdon ki pulit ka wanrah ia ka jingshngain hynrei ha kajuh ka wanrah ruh ia ka jingsngew syier jong ki paidbah bad kane ka shong katkum ka jinglong jingman.