Ki pulit, kim dei ban niat jubor iangi sha kynroh, ong u heh FKJGP

Shillong:U President rangbah ka seng Federation of Khasi Jaiñtia and Garo People, u Bah Dundee Khongsit, ula shah khot hajir ha ka Shil long Sadar police station ha ka 14 tarik Naiwieng 2022, halor ka jing jia kaba la jia ha ka 28 tarik jong u bnai Risaw, ha ka jingiaid paitbah jong ka seng FKJGP, ha kaba ka la don ka jingshah shoh shah dat ki briew kiba iaid ba ieng ha lynti.

Hadien ba la mih na Sadar police station, u Bah Dundee ula ong ba kane ka jingkhot hajir kam don kano kano ka jing sngewpher ne sngew tieng ïa ki nongialam, wat la ki la shah pyn ngat ïa ki kyndon aiñ kumba ngat ki juh ki nongialam shh khmat, namar ka jingtoh kit ki pulit ka long kum ka jingai jinghikai ïa ki khynnah rit.

Ula maham da kaba ong “Ka sorkar bad ka police department kim dei ban ñiat jubor ïa ngi sha ka kynroh, ynda la poi ka kut lad ngim banse ban phai khmat ban ïa tynjuh bor da kiwei ki sien jam” ula ong.

Shuh shuh ula ong ba hadien ba ladep ban pynlong ïa ka jingiaid paitbah, bun ki video kiba la pynsaphriang ïa ka jingshoh briew jong ki dkhot ka seng, hynrei kum ki nongialam ki sngewkmen, ba khlem don mano mano ba thiah pang ha ki hospital.
U bah Khongsit ula ong ba kane ka dei tang ka jingpynksan jong u SP ka East Khasi Hills, ba don kita kiba shitom jur bad kum ka seng kam pdiang satia ïa kane, shi bynta ruh ula kyntu ïa baroh ki paitbah ba lada don kano kano ka jingjia jong ka imlang ka sah lang kim dei ban ïa kmen da kaba pynsaphriang ïa ki video.

Na ka liang ka seng, haba ïa dei bad ka jingbym ioh kam ioh jam jong ki paradoh parasnam ha ki tnad sorkar bapher bapher, ula ong ba ka sorkar ka dei kaba nyngkong ban kit khlieh kumno ban thaw ban pynioh kam ïa ki samla hapoh ka jylla, namar lada ka sorkar kam shim kano kano ka jingkitkhia, ka seng wat la ki don ki jingshah pyrkhing ha kita ki kyndon, hynrei kam salia bad kam tip ha kano ka por kin sa pynlong biang ki jingiakhih paitbah nangne shakhmat.