Ki pulit ki thiah ha madan ha Mukroh, ka um, ka iaid na ka jaka thiah jongki

Shillong:Ki nong shong shnong ka Mukroh kaba hap hapoh ka West Jaintia Hills, ki la dawa na ka sorkar van pynbit pynbiang ia ka jaka sah jong ki pulit kiba ap pahara hapoh kane ka shnong.

Ha kane ka Border Out Post, ki pulit ka Meghalya ki don tang kumba 6 ngut kiba ap bad pahara ha kane ka jaka.
Ki pulit ki iathuh ba ki shem jynjar mynta ban sah ha kane ka jaka, namar la iohi ba kane ka iingsah jong ki ka dei kaba shu tap tang da ka tin bad la ker sawdong tang da ki tyrpar.
Shuh shuh ki la ong, ba mynta ba lah dei ka por slap bad jur ka lyer ki shu thiah ha madan bad ka um ka iaid lyngba ka jaka ba ki thiah. Na ka liang jong ki pulit kiba ap pahara ki la kyrpad ia ka sorkar ba kin leh bad shna kham bha ia ka jaka sah jongki.

Ha ka jingiakren bad u Assistant Rangbah Shnong ka Mukroh u bah Michess Maskut, u la kyrpad na ka sorkar ban pynbiang ia ka jaka sah jong kine ki pulit kiba ap ha kane ka Border Out post.

“Ka jingdon ki Pulit ka Meghalaya, ka ai jingshngain ia ngi ki nong shong shnong, hynrei ngi sngew synei ba ka jaka sah jong kine ki Pulit kam long kaba biang kaba pynshngain ia ki bad dei namar kane na ka liang ka shnong, ngi kyrpad iaka sorkar ban pynbit pynbiang iaka jaka sah jong kine ki pulit kiba pahara ha kane ka Out Post” la ong u bah Michess Maskut.