Shillong,16 Nailar:
U President ka Khasi Student Union (KSU) u Bah Daniel Khyriem, u la ong ba ka jingjop elekshon jong u Dr.Mukul Sangma na Ampati da ka vote jong ki khar Muslim kam mut ba ka jaitbynriew ka la shahrem, “Ka jingjop elekshon na Ampati da ka vote Muslim kam mut ba ka jaitbynriew ka la shah rem” ong u Daniel, haba kren ha ka jingialang bah kaba la long mynta ka sngi ha Motphran kaba ki sengbhalang ki la pynlong kum ka jingdawa ia ka Inner Line Permit(ILP).
Shuh shuh u bah Daniel u la ong ba ki sengbhalang ki la iai shah ia ka jingkular na ka sorkar ban pyntreikam ia ka ILP, ha kaba kane ka jingiaishah ka la poi mynta haduh 11 bnai, hynrei ka la dei ka por banmih paidbah ban dawa ia la ka jong ka hok ban iada ia ka jaitbynriew.
U Bah Daniel haba ai jingkren ha katei ka jingialang paidbah u la ong ba ki seng ki la pynlong ia ka jingiakren ba khadduh ha u Iaiong mynta u snem bad ka sorkar. Utei u nongialam jong ka KSU u la byrthen ruh ba lada ka sorkar kam kohnguh ban pyntreikam ia ka ILP ha ka jingiakynduh jong ki bad u Mukul ha ka 29 tarik kan mad ia ki jingiakhih kiba khlem sangeh haduh ba kan da pyndem bad ban ngeit ia katei ka jingdawa.
“Bulshit” ong U President ka GSU
“BULSHIT!” ong u President ka Garo Student Union haba kynthoh ia ka jinglong jingman jong kawei na ki khyrdop khynra mynder, ha kawei na ki jaka kaba don ha Garo Hills. Haba ai ia ka jingkren paidbah kaba la long mynta ka sngi ha Motphran, halor ka jingdawa ILP u President ka GSU, u la ong ba ka long kaba sngewlyngngoh, ba haba pyrshang ban teh-la-kam ia ka jingwantuid ki mynder sha kane ka jylla, hynrei ka sorkar kam lah ban pyntreikam da ka ILP kumba la dawa da ki seng, hynrei kita ki lad kiba ka la pyrshang lyngba ka Work Permit ruh kim i myntoi eiei ruh. Utei u nongialam Seng u la ongba da la ki jong ki khmat u la iohi ia katei ka buit shukor jong Ka sorkar kum ia kita ki Work Permit ha kaba u la iohi ba ha ki Infiltration Check Gate ne ka jaka ban peit ia ka jingtuid ki mynder khlem ki kot ki sla kiba biang, ba ki mynder da ki trok ki trok ki la tuid sha kane ka jylla ym da kaba pyni ia ki kot ki sla kiba biang hynrei tang ki jingkhublei kti bad ki pulit kiba ap hangtei ka la biang. “Da la ki jong ki khmat nga la iohi ba ki pulit ki ia khublei kti bad kitei ki mynder, yn don aiu ha kti jong lada ym dei ka pisa” ong u President ka GSU bad haba pynpaw ia ka jingdom jong u “Bulshit”” u la ong.
Shuh shuh haba kren kum uwei na ki Nongialam jong kawei ka sengbhalang na Garo Hills u President ka AYWO u la ong “Mynta ka la dei ka por ba ngi ki Khasi, Jaintia bad Garo ngin ia ieng tylli kawei ban ia khun na ka bynta ka hok lajong, ngin dawa beit da ka ILP”.
Na ka liang U Bah Joe Marwein u President jong ka FKJGP Central Body, u la ong ba ki sengbhalang bapher bapher ha ka jingiakynduh jong ki ia u Mukul Sangma, ha ka 29 ntarik mynta u bnai ban ia kren na ka bynta ka ILP, u la ong ba ha katei ka sngi ba la khot da u Myntri Rangbah ki seng kin ia kren beit thik tang ia ka ILP, ym kiwei pat ki mat buhai shnong ki Mynder.
Utei u nongialam jong ki sengbhalang u la ong ba lada ka sorkar ka dang iai bteng ban ia kren ia kiwei pat ki mat ha kaba ia dei bad ka Influx ne ka jingwan ki mynder ka seng kan ym treh ban ia kren bad lkaei kaba ki seng ki la shim rai mynta ka sngi ka long ba lada ka sorkar kam lah ban pynseisoh ia ki jingdawa ILP ki sengbhalang bapher bapher kin shim da ki jingiakhih kiba khlem sangeh tad haduh ba ka sorkar kan da kohnguh.
Na ka liang jong U President ka Jaintia Student Union, u la ong ba ka jingioh ksai bad ka jingsuhthied jong ki khyllah jait ban rung ha kane ka jylla jong ngi ban seng ia ki kam ki kam jong ki ka long lyngba ki thei Khasi jong ngi. “Ki khyllah jait ki pyndonkam ia ki thei Khasi jong ngi kum ki Trading License” ong utei u Nongialam.
U la pynshai ruh ba bunsien hi ki khyllah jait tang ban ioh ban thaw ia ki lad kamai bah eh ha kane ka nongbah Shillong bad ha kiwei ki jaka ka Ri-Khasi ki la pynlong ia koi ba kin wad ktem bad ban wad skum ia kata ka jaka shong shipor jong ki ban lait na ki jingpynthut kiba bunjait ha kaba ka dawbah ia ki ban ioh lad ban leh kumta dei tang ka shongkha.
Hadien ba ki la ioh ban shongkha ia ki kynthei Khasi kim salia namar i la don ki sakhi satar kiba biang ban kam trai ia ka jaka puta neki dukan ha iew. Ki Kynthei Khasi ki long tang kum ki Trading License ia ki khyllah jait, ong u nongialam ka JSU kaba la ban biang ruh ba kitei kim khein snep ia ka jinglong ba kyrpang jong ka jaitbynriew tang ban biang ia lade hynrei lada ki la sngew ba ka la biang kin sa shu jah klep bad hangta kin sa mih ki khun khlem tip kpa.
Phi don ban ong eiei?