Ki pulit bad ki nongniah kali kim tip ia u Diengduh lieh

Shillong, 15 Risaw:
Ka seng jong ki briew kiba duna dkhot met ka Association of Challenged People Meghalaya (ACPM) ki la ong ba ki pulit ba pyniaid kali bad ki nongniah kali kim ithuh ia u Diengduh lieh ban pynieng ia ka kali haba thmu ki briew kiba duna dkhot met ban jam na shiliang surok sha kawei pat.
“Ia kane ngi la lap ba bun ki pulit pyniaid kali ba ki nongniah kali ha ka thain Laitumkhrah kim tip ia une u diengduh lieh”, la ong u President ka seng ACPM u Bah Gabriel Nongrum ryngkat ka jingdonlang ka kong S Lawai ka General Secretary bad ka kong Rida Khyriem ka Treasurer haba iakren mynta ka sngi Balang sha ki lad pathai khubor ha Shillong Press Club.
U Bah Nongrum u la ong ba ia kane ka jingbym ithuh ki pulit bad ki nongniah kali ia u Diengduh lieh ki lap hynne ka sngi haba ki dang sam ia ki kot lyngkdop kum shi bynta ban rakhe ia ka sngi World White Cane Day ne ka sngi ban kynmaw ia ki briew kiba duna dkhot met kiba pyndonkam ia u Diengduh lieh. Don ruh napdeng ki pulit pyniaid kali kiba tip hynrei tang khyndiat eh, la ong u Bah Nongrum.
Katkum ka rukom, haba iaid ki briew ryngkat u diengduh ban kam na shiliang sha shiliang ka surok, ki pulit pyniaid kali ki dei ban pynieng shwa ia ki kali bad ki nongniah kali ruh ki dei ban pynsuki bad ban ieng kham katto katne ka jingjngai ban ailad ia ki ban iaid. Ka jingdon jong kiba duna dkhot met ha kane ka jylla baroh ki don 46,417 bad kine ki kynthup lut ia baroh kiba don duna jingduna dkhot ha ki bynta bapher bapher. Kine ki nongialam kane ka seng, ki la pynpaw ruh ia kawei ka jingeh namar ba ka sorkar bunsien ka heh tang ka nia katba ki kam pat ki jngai.
“ngi la ju leit mih leit iakynduh ia ki ophisar ban iarap ia ki jingdonkam jong ngi, hynrei haba phai pat ia ki kam, kam long kam satia”, la ong ka Kong Lawai. Ka la ong ba ka jingdonkam bad ka jingdawa jongki na ka sorkar ka long ban shna bha ia ki lynti iaid, ki iing ophis ban don da ki lynti iaid kaban pynlah bad pynsuk ia kiba duna dkhot met. “Katkum ka People With Disable (PWD) Act 1995, man ki ophis sorkar ki dei ban don ka lynti iaid ba la shna ban pynlah ia kiba dukan dkhot ban iaid, ki bym dei kyndon”, la ong ka Kong Lawai kaba duna dkhot met ha ka bor iaid hynrei kaba la pyndep ia ka kyrdan pule B.ED.
Na ka bynta kito ki briew kiba donkam ia une u diengduh lieh, lah ban ioh ei na hospital sorkar na Shillong Civil hospital, na ki CHC ba don ha man ki district. Lah ban kdew ba ia kane ka sngi rakhe ia u diengduhlieh la pynbna nyngkong ha ka 15 tarik Risaw 1970 da u President ka International Federation of the Blind (IFB) bad la pynrung ruh ha ka nongrim jong ka United Nations Convention.