Ki por pynher balun

Shillong, 9 Nohprah:
Mar ia pynbna pa khang shnong, ki nongiathoh, ki nong pynlong jingialang, ki nong ia khawai bad kiwei kiwei ki leit bran bran sha ophis, ki kotkhubor ban wad jingtip, halor ka por sdang bad ka por pynkut ia pakhang shnong.
Nalor kiba phone, don kiba wan hi mar met ban pan jingmut, la ka don ne em ka lad ban kham pynjynsur ia ki kynta pakhang shnong. Ki da ujor ruh ba ki la pyrshang ban phone ia ki nongialam sengbhalang bapher, hynrei kaba sngewsih, ka long ba ki mobile jongki, ki la pynlip lut.
Tang kiba la ia kren bad une u nongthoh, ki la ujor, ba ki la buh sngi la slem ia ka jing ia thoh shong kurim bad kumta, kam long shuh ban pynpep bad kumta ki kylli jingmut, la yn leh kumno. Uwei u rangbah, u iathuh ba la pynkhreh ia ka bam ka dih, kaba bun ba kin wan ki nong iathoh na kawei ka nongkyndong ban ia bam ha sor bad ka bam ka dih, kan shu sepei, namar ba u nongshet, un nym lah shuh ban pynduna, namar ba la dep siew boina la shibnai mynshwa.
Haba ki la bun eh, kiba kum kitei ki jingphone bad ki jingiakynduh, une u nongthoh, ula pyrshang ban iakren bad ki nongialam Sengbhalang, hynrei ka jubab, ka long ba ym lah shuh ban pynkylla, hynrei, ka dei bei tang ba kin iaid beit la ka jong ka kam bad ka khreh ka khrum, ba kan nym thut ka jingiathoh, ka jingialang bad kiwei kiwei ki kam.
Haba kumta, une u nongthoh, ula shu ai jingmut noh ia ki nongiathoh, ia ki nongleit jingialang bad ia ki Sengbhalang ruh, ba kan bha ba shu pynher balun ha ki tnum kali, ban ithuh ba kitei ki dei kiba leit shisha, halor ki kam, ki bym lah kiar.