Ki Por ba shitom

AIS SUJA

Ki por ba shitom ki long ki por kiba eh nadong shadong, “To tip ia kane, ba ha ki sngi kiba khadduh, kin wan kip or kiba shitom”. 2 Timothy 3:1.

U Apostol Paul u la thoh ia kane ka shithi kaba ar sha u Timothy ha ki snem 64-66 AD, da kaba pynkynmaw ia kiba ngeit baroh ba ha kita ki sngi kiba khadduh, kin long kipor kiba shitom. Naduh ba la thoh ia kane ka shithi kaba Ar haduh mynta ka la long kum 1058 snem naduh ki por jong u Apostol Paul. Kane kamdei ka shithi briew hynrei kadei ka shithi Blei namar la thoh ia kine kiei kiei da ka jingpyrsat u mynsiem u Blei bad ka long ruh ka ktien kaba im kaba trei kam bad kan pyndep ruh ia kiei kiei ba la thoh ha ka bible.

U Apostol Paul u ka pynkynmaw ia u Timothy bad ia kiba ngeit baroh ban long husiar ia kita ki sngi kiba khadduh – kiba long mynta kein.

PART 1
Ki sngi ba khadduh, ki por ba shitom namar ki briew kin long kiba ieit tang ialade, kiba ieit sbai. Ngi iohi da la ki khmat mynta bun ki briew ki ieit tang ialade khlem don jing i synei ia kiwei pat bad kane ka paw bha ha ka kam ieit sbai (Money lovers). Kane ka jingieit tang ialade ka paw tyngkreng ha kine ki sngi, ha ing ha sem ha ka imlang sahlang ha ka synshar khaddar bad ha baroh ki liang. Ka daw ka long ba ka la trei jubor ka pop hangne ha pyrthei, haba ka jingieit ka la duh, kam don shuh ka jingia map, kam don shuh ka mynsiem jing isynei parabriew. Te namar ka pop ka man bun. Ki jingieit kiba bun ka man khriat, bun ki ieit tang ia ka spah bad ki thom ruh ia ka sang ka ma, wat ban pyniap ia u para briew ruh. Mathaios 24:12. Kumta u thied ka jingsniew baroh dei kaba ieit pisa (ieit sbai). Kita kiba kwah eh ban riewspah ki hap sha ka jingpynshoi bad jingriam… sha ka jingjot jingkordit. 1 Timothy 6: 7-10.

Part 2
Kiba kren sarong bad lehkhraw, ki sngi ba khadduh bun bah ki briew ki kren sarong bad leh khraw, bad kita ki long mynta kein. Ha kine ki sngi bun kiba kop kiba kren sarong bad leh heh leh khraw ialade wat la kimdon eiei, hynrei ka dohnud te ka eh khar khar. Haba kren sarong bad leh khraw, ka pyni ba kum kita, ki don ka mynsiem sarong. Bad uba nyngkong ban don kum kata ka jait mynsiem udei u Lucifer ne u ksuid u soitan. Shisien ba la kiew skong ka jingleh heh bad kren sarong, bunsien u briew u jot noh.
Part 3
Kren sniew bad bymkohnguh ia ki kmie ki kpa – kren ia kaei kaei kaba sinew ki ktien tim ktien sang khlem akor kaba kren bein bad kren khlem nongrim ia kiwei. Kane kadei ka juk ne ki sngi ha kaba ki khun kim kohnguh ia ki kmie ki kpa, bad kim sngewthuh ia ka jingeh ki kmie ki kpa. Bunsien ki khun ki maham pynban ha ka jaka ban kyrpad, la synshar ki khun ia ki kmie ki kpa, pan iaka bymlah ban ioh leh ia kiei kiei kiba pynsngewsih ia ki kmie ki kpa kiba long pyrshah ia kamon ki kmie ki kpa, bad bunsien kum kine ki jait khun ki long khun ioh mon bad kimjupoi shaei shaei hynrei poi pynban sha jingjot bad jingjah burom.
Part 4
Ki bymsngewnguh – Ha kine ki sngi kamdon shuh ka kyntien jingieit jingkhublei iakita ki nonglehbha hynrei bunsien ka don ka jingbymsngewnguh ia kita kiba parabriew kiba la iarap la lehbha iaki, hynrei ki ong pynban u biej ne ka biej ia kito kiba lehbha iaki.
Kiba khlem ieit ia ka kynja – kamut ki bym ieit iala doh ka snam ka kur ka jait ne ka jaid ka kynja. Bunsien kum kine ki briew ki long ki briew kiba awria kiba pynsngew bha iala ka met ha jingkwah awria kiba bret khun sha lynti sha khlaw ki bymsngewthuh iaka sang ka ma, kum kine ki jaidbriew ki long kiba khlem ieit iaka jait ka kynja ne ia kadoh ka snam, hynrei ki ieit tang ia ki jingthala jingpynsngewbha marwei ia ka jingim. 2 Timothy 3:1-4.
Ki long ki sngi kiba eh ki por kiba shitom shisha ban ia kren ia ki jingbha. Haba ngi iohi ia kiba kum kine ia ki jait jinglong ha ubriew to ngin tip ba ngi im ha ki sngi kiba KHADDUH.
Hapdeng kata, u Blei u khot ia ki briew sha ka jingkylla kabamut da kaba ong – “Na kine ruh to phai noh” 2 timothy 3:5. U Blei u dang ap ia kane ka pateng bynriew ba ki briew kin phai noh kin kylla bamut noh hapdeng kine ki por kiba shitom.