Ki por ba shitom

AIS SUJA

Ngi im ha ki sngi bad ki por ba shitom, shitom nadong shadong. Bad haba ngi iohi iakaba kumkata kapor ngi tip ba ki long ki sngi kiba khadduh. Ka ktien u Blei ka kren shai ka ong ba ki sngi bakhadduh kidei kipor ba shitom namar ba ki briew ki long kiba ieit tang ialade, ki ieit sbai, kren sarong, lehkhraw, krensniew, kim kohnguh ia ki kmie ki kpa, kim sngewnguh, ki bym khuid, khlem ieit ia ka kynja, khlem map, kiba kren siar, leh bymsuidniew, kiba runar, ki bym ieit ia kaba bha, ki nongdie lok, hanga mei,leh meng, ki ieit ia ka jingsngewbha ban ia kaba ieit ia u Blei. 2 Timothy 3:1-4.

Bun bah ki briew kim sheptieng ia uBlei bad ki pyrkhat ia u Blei, ki pyrkhat tang ialade kumba la ong ka ktien u Blei, U Blei u iohi ia ka dohnud u briew ha kine ki sngi ba ki jingpyrkhat baroh ki lalong bymman hala kasngi. Genesis 5:5-7. Kane kala jia haki por u Noah. Ka Bible ka iathuh ba haki sngi ba khadduh shwa ba u Jisu un wan pat, ki briew ki long kumba long haki sngi u Noah te kumba la long ha kine ki sngi u Noah, kumta ruh kan long ha kata ka jingwan u khun u Briew (Jisu). Mathaios 24:37. Kine kidei kita ki sngi kein, ki sngi kiba u Blei u bitar ia ki briew ha sla pyrthei nakadaw ki jingbymman jong ka pythei u Blei u la phah ia kidak kajingbitar jong u da ki jumai, ki jingiapthem, ki khlam (pandemic), ki puid khlam (holocust), ka jingshlei um bad shibun kiei kiei kumba ula phah ban jia ha Egypt hyndai.

Ha kine ki sngi, ki briew kidei ban pyrkhat ba haba ngi wan sha kane ka pyrthei, ngi wan thylli. “Ngim shym la wallam eiei, hynrei haba ioh jingbam bad jainkup, dakata ngin sngewhun. Hynrei kiba kwah ban riewspah, ki hap sha ka jingpynshoi bad jingriam sha kiba bun ki jingkwah brai kiba biej kiba pynsniew kiba pynjyllop ia ki briew sha ka jingjot bad ka jingkordit. Namar u thied ki kynja ba sniew baroh long kaba ieit sbai (ieit spah). 1 Timothy 6:7-10.

Dei nakata kadaw ka ong ka ktien u Blei” To mynta phi kiba riewspah to iam to lyniar namar ki jinglanot khop jongphi kiba la wan ha phi. Kata ka spah jong phi kala pyut noh, ki jain kup jong phi ki labam sarang, te ka jingsarang kalong ka long ka sakhi pyrshah ia phi bad kan bamduh iaka doh jongphi kum ka ding. Phi la kynshew la ka jingkynshew HA KI SNGI KIBA KHADDUH. Jakob 5:1-3.
Bun hakine ki sngi bakhadduh ba kiba riewspah ki lynniar kumba la ong da ka ktien u Blei. Bun ha ki Ri kiba khraw ba riewspah ki shem ba ka spah kam myntoi shuh iaki haba kane ka khlam ka lawan ban tap ia ka Ri ka daw ka long ba kata ka spah kamlah ban iada ba pynim naka khlam coronavirus. Haba kane ka jia ka pynkynmaw ha ngi ia kane ka ktien u Blei ba kata ka spah kamlong eiei ha khmat ka jingiap.
Bun ruh ha kine ki sngi ba khadduh ki ia beh ia ka spah corruption kat haduh ba ki ba duk kila nang kyrduh namar ka jingbam klop iakaba bhah jong kiba duk. Ka ktien u Blei ka pynpaw ka ong – “Ha khmih ka bai nong jong kita ki nong trei kiba la trei ia ki lyngkha jong phi, la bat klop noh maphi (la bamsap), ka kyang kyrpad: Te kita ki jingkyang jong ki nongtrei kala leit bsut sha ki shkor u Trai ki paid. Phi la shongsuk sarong ha ka khyndew phi la im pahuh pahai phi la pynsngaid ia ki dohnud jong phi ia ka sngi ka jingiap?. Phi lapynrem noh phi la pyniap ia uba hok, TE UN IENG IALEH PYRSHAH IA PHI. Jakob 5:4-6.
Namar kata ong ka ktien u Blei. “To kiar naka jingkwah lalot: namar ka jingim u briew ka shong satia haka jingdap kyrhai jong kiei kiei kiba u don. (A man’s life does not consist in the abundance of his possession.) Loukas 12:15.
Ka mynsiem ka kham kor iaka spah. Dei nakata kadaw ka ktien u Blei ka ong haka pharshi shaphang u Riewspah babiej – “Ah me u biej, ha kane ka miet ynpan noh ia k mynsiem jong me na me te ki jongno te kin long kine kiei kiei ia kiba me la khreh lypa ?. Loukas 12:20.
Ngi im ha kine ki sngi khadduh, kipor ba shitom, kamdei eh ban pyrkhat tang halade ia ka spah kane ka pyrthei namar ymtip aiu kan jia hakaba lashai? Peit aiu la jia mynta ha pyrthei. Nakata kadaw ong u Blei – “wat ai ba u riewstad un sarong ha ka jingstad, uba khrawbor un sarong ha kabor, u ba riewspah un ym sarong ha ki spah jong u. Hynrei to sarong hakane naba phi tip bad ithuh ba nga long u Trai uba leh ia ka jinglehieit, jingbishar bad iaka hok ha khyndew (pyrthei). Jeremaiah 9:23-24.
Kadei ia baroh ban kylla bamut noh ban wad ia ka Hima u Blei, namar ia kiei kiei baroh u Blei un sa ai lang tam ( un ai bad un pyntam ruh). Loukas 12:31. Amen.