Ki player World Cup kim ju shong ha ka juh ka liengsuin: PM Syiem

Shillong,6 Rymphang:
‘Ki player World Cup kim ju ia shonglang ha ka juh ka plane, namar ioh lehse kan bthei, mano pat ban ialehkai, yn ym don player shuh na ka kynhun baroh kin iap lut’ ong u Bah Pynshai Manik Syiem haba u Rupang u la kylli na u hato kiei ki daw kiba la pynlong ia u ban jied ia ka party KHNAM katba ka khun jong u ka kong Teilinia Thangkhiew ka la jied ia ka HSPDP, bad balei kim long hajuh. Kham hadien u bah Pynshai u la ong ba ka Party KHNAM bad ka HSPDP ki dei ki party riewlum kiba ieng ha ka nongrim jong ka jaitbynriew bad kitei ki nongrim treikam kitei ki party ki jan long hi mar kumjuh. ‘kam don jingpher eiei haba dei ia ka juh ka thong’ ong u bah Pynshai.
Shuh shuh u bah Pynshai u MLA barim ka Mylliem haba ia kren bad u Rupang , u la ong ba kitei ki ar ngut ki shi kpa shi khun ki la ialeh na kajuh ha ka elekshon ba la dep, kaba mut ba ki dei ki kyrtong shimet bad mynta pat kin pyrshang noh ban ialeh la ka jong ka jong ka party. ‘Ngi la ialeh na juh, ngi la rem, ngin leh ehdaw noh la ka jong ka jong’ ong biang u bah Pynshai.
Lah ban pynkynmaw ba u bah Pynshai M Syiem u dei u MLA barim ka Mylliem, bad u la ialeh ia ka elekshon MLA ba dang shu dep na Mawphlang Konstitwensi bad u la shah rem noh, mynta ka kynti un ia aireng biang ha ka MDC na Mawphlang –Diengiei Konstitwensi kum u kyrtong ka KHNAM. Ka kong Teilinia ka khun jong u ruh ka la shah rem ha kane ka elekshon MLA 2013 na Mylliem Konstitwensi , ka la iakhun kum ka kyrtong shimet, mynta ka kynti kan ia aireng kum ka kyrtong ka HSPDP.