Ki par maw bad karkhana la shu khaii benami ki dkhar na Assam

Shillong, 07 Naiwieng:
Ka Confederation of Ri-Bhoi People (CoRP) ha ka sngi Thohdieng ka la hiar jurip ia ki jaka tih maw bad ki karkhana tylliat maw ha Rani Jirang ha khappud ka Meghalaya bad Assam, bad ka la lap ba bun ki par maw bad karkhana tyllait maw la shu khaii benami da ki dkhar na Assam ha ka kyrteng ki trai jaka kiba dei ki nongshong shnong hapoh ka Hima Jirang.
Ia kane ka jingleit jurip, la ialam da u President ka CoRP u Bah Bandary Ryntathiang, lem bad kiwei ki dkhot ka seng, bad la lap ba ki dkhar kiba pyntrei ia ki par maw bad ki karkhana tylliat maw kiba leh meng bad leh donbor bad ki la kynnoh ka kitei ki jaka baroh ki dei jong u bah W Doloi, Sordar ka shnong New Amkrem, Jirang bad ki shu trei kum ki nongbylla.
Ka CORP ka la iakynduh ia u Bah Doloi, uba la iathuh ba ki don tang 4 tylli ki par maw bad 4 ki crusher jongu kiba shah kyrteng ia ki khun bad ka lok jong u, hynrei ki don jong kiwei ruh kiba dei trai na Jirang hi.
Ha ka thain Rani Jirang ki don palat 90 tylli ki par tih maw bad 50 tylli ki karkhana tylliat maw bad ka la long kum kawei ka Industrial Area, bad la ioh ba bun ki lum ki la madan na ka jingtih ia ka khyndew bad ki maw kaba long ka jingma ia ka lawwei.
“Kaba lyngoh ka long ba bun kitei ki par maw bad ki karkhana tylliat maw ki dei ba shah kyrteng jong ki khun ki lok bad kiba haiing ha sem jong ki myntri, ki rangbah shnong bad ki riew pawkhmat ka thain”, la ong u President ka CoRP.
Ka la lap ruh ba ki nongtrei ha kitei ki par maw bad ki karkhana kim don satia ia ki labour lisence, ba la pyntrei kam da ka KHADC kumba ia kiwei ki nongbylla.
Halor kane, ka CORP ka kyntu ia ka KHADC kaba ieng bad ialap ban pynneh pynsah ia ka riti ka dustur bad ka khyndew ka syiap ka dei ban shim khia mardor ia katei kam ban khang noh ia kitei ki par maw kiba pynmyntoi ia ki briew na shabar bad pyniap pat ia ki trai shnong.
Ka CoRP ka sngewkhia jur halor kane kam khaii benami, ba ki trai ki shu shah kyrteng tang ban ioh bnai katba ki dkhar kiba kam ba dei nong bylla ki kylla malik ia ka kam bad ka spah.
Ka seng kan sa leit ban kynduh ia u Syiem Jirang bad kan leit ban ujor sha ki bor ba halor kum ka NGT, ba dei ban khang noh ia katei ka jingtih maw bad ia baroh ki karkhana tyllia maw na bynta ban pynneh pynasah ia ka mariang kaba la synlen.
Ka CoRP ka kyntu ruh ia ki paidbah ka thain ban ai ka jingiatrei lang halor kane ka kam tad haduh ban da kut, namar ka long ka jingma ia ka lawei ban wan lada kane ka kam kan dang iaid bteng, bad ki lum jong Hima Jirang kin sa kylla madan jong ka Assam.