Shillong: U kyrtong MP ka Congress u bah Vincent H Pala u la jop biang ha ka sien kaba lai na ka Shillong Parliamentary constitituency.
Haba kren mynta ka sngi, u bah Pala u la ong ba ka jingjop ka BJP ha ka ri, ka long ba ki paidbha ki kwah ban ailad ai sien ia u Narendra Modi kumba jia ia u Manmohan Singh.
“Ki paidbah kin ai ar sien ia u Modi kumba ai ia u Manmohan Singh ruh bad kin sa ai biang ia ka Congress hadien ka san snem. Ka san snem ka dei kaba lyngkot”, la kam u bah Pala hadien ba la u la jop.
Ha kajuh ka por, u la ong ba man ka elekshon ka don ka jingiapher bad ha kane ka kynti ka jingjop ka la kham kyndeh namar ba ka la khambun bha. “Nga ai khublei ia ki nongtrei ka party, ki paidbah ki nongkyrshan. Ka ioh kam ioh jam, ka lynti synkieng ki dei ki mat”, u la ong.
U la kam ka jingiakhun ha kane ka kynti kam dei ia u kyrtong monlang ka MDA hynrei ka dei pyrshah ia u kyrtong ka UDP.
“Phi lah ban pyniatylli ia ki nongialam hynrei phim lah ban pyniatylli ia ki nongthep vote bad ngam shym la iakhun ia kyrtong monlang hynrei nga iakhun ia u kyrtong ka UDP”, la kam u bah Pala.
Hynrei ha kajuh ka por, u la pynpaw ka jingsngew babe ia ka jingshah rem u Dr Mukul Sangma na Tura.
“Nga sngew nguh ia u Dr Mukul wat hapdeng ka por ba lyngkot u la ialeh bha. Kawei ka dei namar ba ka Agatha ka don ha ka bor ha kaba u Conrad K Sangma uba don ha ka sorkar”, la ong u bah Pala.
U bah Pala u la khur 419689 vote katba u Dr Jemino u ioh 267256, bah Sanbor Shullai ka BJP u ioh 75786, u bah THS Bonney u ioh 6580, bah Phira Rani u ioh 4961, bah Samuel Hashah u ioh 4601 bad NOTA 4420.
Phi don ban ong eiei?