Ki paidbah, kim dei shuh ban jied tang ia ki nongmihkhmat, ong ka HNYM

Shillong:Ka Awakening Indian Movement, ha ka jingialam jong u bah Banshai Marbañiang, lem bad ka jing don u bah Louis Dohtdong president jong ka Hynñiewtrep National Youth Movement (HNYM) lem bad kiwei pat ki kynhun seng kiba sngewkhia thew haba iadei bad ka rukom jied bad phah ia ki nong thawaiñ sha dorbar jylla, ki la pynlong ia ka jing pynshai paidbah haba iadei bad ka jingjied ia ki nong thawaiñ sha ka ïingdorbar thawaiñ jong ka jylla Meghalaya.

Haba ai jingkren ha kane ka jingialang u President jong ka seng HNYM, u la ong ba ki paidbah nongthep vote ki dei ban sngewthuh shwa ba ki dei kiei kita ki MLA kiba ki la jied ban phah leit shong dorbar ha ïngdorbar thawaiñ, hato ki dei kiba shu mihkhmat ne ki ban thaw ia ki aiñ ki ban iada ia ki nong shong shnong jong ka jylla, ne kiba shu mih shisha tang ka khmat khlem kren eiei na bynta ka jing bha jong ki paidbah. Ki paidbah ruh ki bun ki bym tip kaei kata ka sorkar,ka sorkar ka dei u paidbah, katkum ka riti synshar paidbah.

U la ong ruh ba ki paidbah kim dei shuh ban jied tang ia kita ki nongmihkhmat, namar la iohi ba ha ki 50 tylli ki snem, la iohi ki shu mih shisha tang ki khmat, ha kaba kim kren eiei ha assembly, ki shu ia khapbrip ki khmat ngaiñ-ngaiñ, hynrei ladei ban ong jied ia ki nongthawaiñ ki ban leit sha assembly na bynta ban iasaid iatai ia ka khia ka shong jong u paidbah jong ka jylla, ym shuh u ban shu mihkhmat, la ong u bah Dohtdong.

U bah Louis Dohtdong,u la ong ruh ba ka por ka la dei ban tip ba kaei ka jingiapher ha pdeng u nong mihkhmat bad ki nongthawaiñ, ka jingiapher ka long ba ki nongmihkhmat ki dei kita kiba, lada u kpa um lait ban leit dorbar shnong u phah leit da u khun tang ban shu leit mihkhmat bad um don kam ban kren eiei tang ban ioh kyntiew kyrteng, katba ki nongthawaiñ pat ki dei kita kiba ki paidbah jong ka dong ka thaiñ kiba la pynkhamti ba kin leit ia thaw aiñ ha assembly, ki ban wan rah la ki jong ki jong ki mat ki ban pynim ia ka jait bynriew, la ong u bah Dohtdong.

U nongialam jong ka HNYM,u la ong ba ki paidbah ki dei ban kiar noh ia kiei kiei kiba shu aiei, khamtam ha shwa jong ka elekshon ba ha shwa ban shim dei ban kylli balei ki tyrwa ei, khnang ban lah ban ioh shisha ia kita ki nongthawaiñ kiba lah ban thaw ia ki aiñ ki ban iarap bad ai jing myntoi ia ki paidbah.