![](https://www.urupang.com/wp-content/uploads/2024/03/DSC00678-1.jpg)
Shillong:U Bishop Purely Lyngdoh uba dei u President ka Shillong All Faith Forum (SAFF) u ong mynta ka sngi, ba ki paidbah kim dei ban shongshit khlieh, haba ioh sngew ia ki khubor nangne nangtai namar ba bun ki khubor ki bym shisha.
U la ong ba ha kine ki sngi ka lyer ka jingkylla ka la mih, ka bym sngew tynnad ha kane ka ri India kaba don bun jait ki jaitbynriew bad ki jait niam bapher bapher. Ka thain shatei lammihngi ka dei kaba im suk im sain hapdeng ki jaitbynriew bapher bapher hynrei mynta ym lah ban ong ba la jan ka elekshon ne ba wan kawei ka lyer na bynta ka ri, namar ba la mih ki kynhun kiba kren jam ia ki jingdawa jongki lyngba ka niam bad kane ka long kaba sngewsih ka bym ju don ha ka jylla bad ha ka ri.
“Ha kine ki sngi ka lyer ka jingkylla ka la mih, ki bym sngew tynnad, kiba sngewsih ha kane ka ri India kaba don bun jait ki jaitbynriew bad ki jait niam bapher bapher. Ka North East ka dei kaba im suk im sain hapdeng ki jaitbynriew bapher bapher hynrei mynta ym lah ban ong, ba la jan ka elekshon ne ba wan kawei ka ler na bynta ka ri, ki mih ki kynhun kiba kren jam ia ki jingdawa jongki lyngba ka niam bad kane ka long kaba sngewsih ka bym ju don ha ka jylla bad hynrei mynta la wan kum kine ki jingkren ki jingdawa”, la ong u Bishop Purely.
Ha kajuh ka por, u la pynpaw ia ka jingsngew khia ia ka jingmih ki kynhun kiba kren pyllein pyllein ia ki jingdawa jongki lyngba ka niam, bad kane ka la wanrah ka jingsngew sih bad ka jingbym sngew tynnad namar ba ka jylla Meghalaya bad ka thain shatei lammihngi ka India ka dei kaba ju shongsuk shongsain hapdeng ki jaitbynriew bad ki jait niam bapher bapher ha ki por ba la leit.
Mynhynnin ka sngi, ka SAFF ka la pynlong ia ka jingialang ban iakren ia ki jingjia kiba ktah ia ka jingsngew jong ki jait jingngeit bapher bapher namar ka jingmih ki jingjia khamtam dang shen ha jylla Assam ha kaba ka sister ka la shah leh tohmet ha ki briew da kaba shah pynhiar na bos bad shah kren bein.
Ula kyntu ia ki paidbah nongshong shnong na ki jait niam bad jaitbynriew bapher bapher ba kin ia im lang imsuk ryngkat ka jingsngewthuh jingmut, ym ban wanrah ia kano kano kaba pynjngut ia ka shongsuk shongsain.
“Ka SAFF ka kyntu ia ki nongshong shnong ha ka jylla ba ngi dei ban long kiba jai jai, kiba jynsur ka jingmut jingpyrkhat, ngim dei ban long kba shongshit khlieh haba ioh sngew nangne nangtai, namar ba bun ki khubor ki bym shisha. Ngi dei ban im lang ha ka jylla hapdeng ki jait niam bapher bapher, ban wanrah ia ka jingiasngewthuh jingmut, ka jingiasngew tynnad”, u la bynrap u President ka SAFF.
Phi don ban ong eiei?