Ki paidbah ki la ngiah pakhang shnong, ong U SP East Khasi Hills

Shillong,29 Risaw:
“Ki paidbah ki la ngiah ia ki Bandh, ngi la iohi ia ka jingsdang ngiah jong ki” ong u SP ka East Khasi Hills u Bah M Kharkrang haba ia kren bad katto katne ngut ki nongthohkhubor. U Bah Kharkrang u la ong ba ki jingiakhih bad ki pakhang shnong, pakhang ophis, pakhang surok miet kiba la jur eh ha kine ki khyndiat bnai ba la dep myngta la i kumba kim trei kam shuh bad kane hi ka pyni ia ka jingngiah jong ki paidbah. “Ki sngewthuh ba kitei ki Bandh bad ki jingiakhih ki ktah pynban ia ka ioh ka kot jong ki” ong biang u SP uba la kdew ruh ba ka 36 kynta ka pakhang shnong ba la khot da ka HNLC ha ka sngi wan u President ha ka jylla kam treikam ha kaba ki la don man ki kynhun tem kiba ia tem ia put pynshongshit ha Khyndailad.
Haba la kylli hato la kane ka jingngiah u paidbah ka dei tang ha kane ka District ne ka long ruh kumjuh ha kiwei pat ki district jong ka jylla, u bah kharkrang u la ong ba ka Shillong ka dei ka nongbah jong ka jylla bad kaei kaba la jia hangne khlem pep kan long ruh sha kiwei pat ki district ba ki paidbah ruh shen kin sa ngiah ia ki jingkhot iakhih ki sengbhalang.
La iohi ba ha jan manla ki jaka la pynrben ia ki pulit pahara khamtam ha kito ki jaka ba kham jia bha ki kam pyntriem ha ki kynta pakhang shnong ne kiwei pat ki jingiakhih ba ju khot da ki sengbhalang, halor katei ka phang ki nongthohkhubor ki la kylli na u SP hato katei ka jingpynrben pulit ka ktah ne-em ia ki kynta treikam jong ki (duty hour) u SP u la ong ba ka ktah ia kynta treikam jong ki pulit ha kaba uwei u pulit u hap ban trei naduh 10-12 kynta ha ka shisngi, kaba la iapher na kaba ju long 8 kynta man ka sngi. U la ong ba la pynrben kumtei ia ki pulit namarba ki jingjia bad ki kam pyntriem kim jia tang ha ki por ia khih bad ki jia wat ha ki sngi bym shym la khot iakhih ruh.
Haba la buh jingkylli halor ka jingdon ki ophisar pulit bad ka jingkhlain bor ki pulit, u Bah Kharkrang u la ong ba kumba ka long mynta u lah ban tuklar dalade hi, hynrei hap ban ia peit ruh ia ka jinglong jingman jong ka pyrthei ( iakhih) ha ka jylla ha kaba u la ong ba lah ruh ban dang donkam “ Ia mynta ngi long kiba biang” ong utei u heh pulit ka jylla uba la ong ruh ba u don ia ki ophisar kiba trei hok ia ka kam bad kiba kloi ruh ban trei 24 kynta ha ka shisngi kaba u lah ban khot ia ki ha kano kano ka por ba donkam.