Ki paidbah ki la ngiah ia ki party rim: BJYM

Shillong, 12 Nohprah:
Ka BJYM Meghalaya ka la ther kylla ia ka jingkynnoh jong u nongialam ka UDP u Bah Bindo M Lanong, ba ka party BJP ka dei kaba kwah ban pynkylla Hindu bad ban khang bam doh masi.
Haba pynlait khubor mynta ka sngi, u President ka BJYM u Bah Egenstar Kurkalang u la ong ba ki paidbah ka jylla Meghalaya ki la ngiah ia ki party rim kiba heh tang ka jingkular khlem lerkam bad ki paidbah mynta ki la phaikhmat sha ka BJP.
“U Bah Bindo u dei ban hiar shuki noh na ka kam Working President ka UDP, namar ba u la thmu ban ialam bakla ia ki paidbah bad ban pynpait jaitbynriew ha ka kyrteng ka niam”, la ong u Bah Kurkalang.
U la ong ba ka jingkren jong u Bah Bindo ha ka jingialang ialap elekshon ha Muktapur ha ka sngi Saitjain, ka pyni ba ka UDP ka la duh ia ka jingshaniah na u paidbah bad kim banseban shim ia ka ishu khyllung khynnah da kaba pyrshang ban tei pop bad kynnoh ia ka BKP.
U President ka BJYM u la ong ba ha ka jingshisha u Bah Bindo u la long teng u Symbud Myntri Rangbah ka jylla, u Lamphang ka iing dorbar bad uba la tbit ha ka ain hynrei ka jingkren jongu, ka long ban ialam bakla ia ki paidbah.
“Ki paidbah kim dei ban ailad ia kum kine ki briew bym don nongrim namar ba ki pyrshang ban shu ialam bakla beitia ki paidbah”, la ther u President ka BJYM.