Shillong: Bun ki paidbah ki jied ia ki MP ne MLA ne MDC da ka jingsngew ieid ne sngew shem mynsiem hynrei ka la dei ban pynkylla ia kane ka rukom jied ia ki nongthaw ain.
U myntri sorkar barim ka jylla u bah Robert G Lyngdoh haba pyni nia ha ka jingiathir halor ka jingjied ia ki nongthaw ain mynta ka sngi, u la ong ba ki paidbah kila dei ban kylla ka rukom jied ia ki nongthaw ain bad u sngew ioh mynsiem haba u ioh sngew na ki samla ba kin jied ia ki nongthaw ain da ka jabieng (intellectual) ym da u dohnud (emotional).
“Ka donkam ban ai ka jingshai sha ki paidbah ba kin sngewthuh ba ka kam ban jied ia ki nong thaw ain, ka dei ka kam lajong jongki, ki dei ban sngew trai bad hangta ki paidbah kin nym jied shuh tang ba iadei parakur ne ba iadei paralok”, la ong u bah Robert.
Ula ong biang, “Bunsien ki briew ki thep vote da ka jingsngew (emotional), ym da ka jabieng (intellectual). Kim ju pyndonkam ban pyrkhat shwa ban jied ia ki nongthaw ain” .
U bah Robert u la ong ba ka jingbym pushe ki paidbah, ka la pynshlur ia ki politishian ban kamai spah khlem nongrim. “Ki mat elekshon ne manifesto tang hadien ba la dep elekshon, ym don ba bna eiei shuh, ki paidbah kim ju kylli hi ruh ia ki kyrtong ynda kila wan biang ban pan jingkyrshan man ka san snem”, la ong u bah Robert.
U la ong ba mynshwa ha ka por ba ka elekshon ka la pan ia ka spah ne ka jingdon jingem jong ki kyrtong, la sngew tieng hynrei mynta ki kyrtong kim pyrwa eiei namar ba ki paidbah ruh kim pyrwa eiei ia ka jingkamai spah ki nongthaw ain. “Lada u MLA u kamai 30 lak mynta hadien 5 snem, u kamai 1 klur, ki paidbah kim buh jingkylli shaei bad naei u ioh ia kane ka pisa”, la ong u bah Robert.
Ha kawei ka liang, u Chief Electoral Officer (CEO) ka jylla u bah Frederick Roy Kharkongor u la ong ba ka ain elekshon ka Model Code of Conduct ka long ban tehlakam ia ki nongialehkai ba kin kiar na kaba pyndonkam da ki rukom kiba long beain.
U la ong ba ka tnad elekshon ka la pyntreikam ia ka App kaba khot ka Citizen Vigil (CVIL) ha kaba ki paidbah ki lah ban pyndonkam da kaba thep ia ki video ne ki dur haba ki lap ne shem ia kano kano ka jingpynkhein ia ka ain elekshon. “Haduh mynta ngi la ioh pdiang kumba 30-35 tylli bad kiba bun ki dei ha jaka sor ba pynkhein ia ka ain elekshon kum ka jingtah dur, tah poster”, la ong u CEO bad bynrap, ba ym lah ban phah dur ne video kiba shu leh thok lyngba kane ka App.
U la ong ba ha kine ki sngi, ki don ruh ki briew kiba shon dur pynban ialade da kaba phah ha kane ka App bad kane ka dei ka kam biria bad kim dei ban leh ia kum kane.
“Ngi pyndonkam da ki buit stad teknoloji ban tehlakam ia ki jingpynkhein ia ki ain elekshon”, u la ong bad bynrap ba ka App kan long kaba donkam bha ia ki paidbah ban peitngor ia kino kino kiba pynkhein ia ka elekshon.
Phi don ban ong eiei?