Ki paidbah ka Ri Khasi ki syier mynsiem, kim nang iohthiah, ki khiah jingmut, haba ki la lah iohi bad shai hi kdar ia ka ingthmu barieh jong ka sorkar ka Ri India khamtam haba ka sorkar BJP ka lah ioh ban synshar, kane ka Sorkar ka i kumba ka la leh klet ba ki briew ki ba shong ba sah ha ki thaiñ ka North East India ki long ki Jaitbynriew rit-paid ki ba ha ka jingshisha ka dang dei ia ka Sorkar ba kan pynkhlaiñ shuh shuh ia ki Ain ai Jingiada na ka Jingpyrshang buhai shnong ki briew ka ri thor bad ki bar ri ka Bangladesh ka ba la lah ktah haduh katta katta bad buh Jingma ia ki rit-paid kane ka thaiñ pynban ia ki hok ban ioh Jingiada la shu thmu ban shim bad khnieh jubor noh syndon da ka Jingsynshar donbor kaba khlem jingisynei shuh bad la pynbna pynban ban wanrah syndon da ka Ain CAB ka ba long ka Jingthmu ban ioh tap tyllup ia ngi tad haduh ba ngin da jah noh syndon na kane ka sla pyrthei.
Mynta ba la jan ka Election MDC lah mih ki kyrtong ki ba pyrshang ban pynbiej da ka ba shim kabu wat ban jer ban nam ia ki Daw-bah jong ka Jaitbynriew khlem da puson bha ia kaei ba ki la lah kular la ki don shisha mo ka bor ban leh kumba ki ong. Namar ba ka ju dei hi ka rukom ia ki kyrtong ban ai jingkren ban pynshai ia kita ki rukom treikam (manifesto) jong ki, baroh baroh ki shu ia sot ia ki juh ki Jingong ba ngin wanrah ha phi ia ki Jingiada ia ka Khyndew ka Shyiap, ka Riti Dustur, Ka Shong suk ka Shong shngaiñ, ka Bha ka Mait bad kiwei kiwei. Ka Ri Khasi ka la jan kot 50 snem naduh ba la ioh ia la ka Jylla ba pura ka jong ka hynrei ka Ri Khasi ka shu nang iai tlor noh kat nang mih ki sngi kata ha ki liang baroh khamtam ha ka liang ka ioh ka kot bad ka khaiï ka pateng namar ba kiwei pat ki Jaitbynriew hehpaid ki la lah nang ioh bor ban synshar ia ka khaïi ka pateng hangne ha Ri jong ngi, namar bym don ka Ain ban khang ia ki kumta ki lah ioh lad ban pyni bor bad ban leh trai haduh ba ki lah khnieh lut ruh ia ki kam ki jam bad ki da buhai shnong katba mon, ki la wanrah ia ki lok ki khun, ki ba haing ki ba hasem, ki paralok ki parajor ban ioh pynroi paid katba ki lah, hynrei katba ki khun khasi ki shu la iai long mraw ha la ka jong ka Ri da kaba hap ban long tang kum ki nongbylla hakhmat ki mynder shi sngi.
Ko Sorkar MDA ngi kyrpad ia phi ban sngewbha ban ai noh ia ka ILP bad ia kane ka Ain dei ban pyntreikam noh khlem da pynslem shuh, ai noh ia ka ILP shuwa ka Election MDC khang ba ngin lah ban dang shaniah ia phi ki Nongialam bad ki party ki ba synshar mynta.
Hadien ba ngi lah ioh ia ka Ain ban Iada ia ka Jaitbynriew kata ILP nga ngeit skhem ba ki paidbah da ka Jingstad bad jingsngew kitkhlieh kin sa jied ia ki nongialam ki ban leit sha ka District council.
Katto katne ki daw-bah ba kham hakhmat tam eh ka jong ka Ri Khasi kiba ki nongmihkhmat paidbah ba shisha bad kiba hok kiba U paidbah ka Ri Khasi un sa jied shen sha ka District Council kiba ki dei ban shim khiah bha ban iakhun dohiap dohim ki long ban pymkhlaiñ shuh shuh ia ki Jingiada na ka Jingbuhai shnong jong kino kino ki Jaitbynriew ki bym dei hok ban ioh jaka shong shnong ha ka Ri Khasi, Ka Jingpynbeit ia u pud u sam ba kan ym dei ban leit noh wat tang shi phut ka jaka sha ka Assam ne Bangladesh bad nangta ki dei ban ialeh ban pynkhlain noh ia ka khaïi ka pateng ha la Ri khnang ba yn lah ban kyntiew ia ka ioh ka kot ki para Ri kloi katba lah ei bad da kane ngin sa lah ban khanglad ia u khariong kharlieh ba un ym ioh leh mon ha ka Ri jong ngi.
B. Nengnong