Shillong: U kyrtong ka Congress na Mylliem u bah Ronnie V Lyngdoh u la kyntait ba kan don kano kano ka jingeh ia u ha kane ka elekshon MDC ban poi sha ka thong tang namar ka jingiatreilang u MLA u bah Hamletson Dohling bad ka MDC ka kong Teilinia Thangkhiew.
Haba kren myn hynnin ka sngi hadien ba la thep kyrteng, u bah Ronnie u la ong ba ka jingiatreilang jongki kam mut ba ki paidbah ruh ki iatreilang. “Ar ngut ki iasoh lang ma ki, u paidbah um iasoh lang, u khlem wan lang. Ki paidbah ka Mylliem konstitwensi kim dei kum ki langbrot shu kynshu ban shu niah ma phi, u dei uba stad u paidbah ka Mylliem”.
U la ong ba ka long thikna mynta ba ka Congress kan wan ha ka bor ha ka KHADC bad kan ialam ia ka Executive Committee.
U la ther ia kane ka sorkar kaba thmu ban pynbiej ia ka ain shna iing ka Meghalaya Urban Development Authority (MUDA) da kaba kam ba ka la aiti ha ki district council hynrei ka dei ka sorkar kaba rim kaba la leh ia kane ha ka 14 tarik Nohprah 2017.
U la ong ba ki paidbah ki la ioh ban bishar ha kine ki shi snem bad ki la stad mano ba kham biang ban long nongmihkhmat jong ki.
“Ka jingwan phai jong nga ka dei ka jingkwah jong u paidbah kiba la pynpaw ba ki dang kwah ia nga”, la ong u bah Ronnie.
U la ong ba ki paidbah ki dei ban sngewthuh ba ka district council ka dei ka iing dorbar thawain kumba long ka iing dorbar ka jylla bad ka Parliament bad ka donkam ia ki ain ban pynneh ia ka riti dustur, ka khyndew ka shyiap bad kiwei ban iada ia ka jaitbynriew rit paid.
U la ong ba ka district council kan iada lada ka sorkar pdeng ba ialam ka BJP kan pyntreikam ia ka Citizenship Amendment Bill 2016, kaba thmu ban pynlong Hindu ia ka ri India.
“Lada kam don ka district council ngi la long kum ka Sikkim, ka Tripura ban kylla rit paid ha la ka jylla lajong”, la ong u bah Ronnie.