Ki ophisar MCS, kum ki shipai ka sorkar, ong u MR

Shillong, 15 Lber:
U Myntri Rangbah ka jylla u Dr. Mukul Sangma u la ong ba ki politishian bad ki babu sorkar ki dei kiba shah bishar bha ha ka rukom pyniaid ia ka synshar ka khadar bad u la kyntu ia ki babu MCS ka jylla ba kin long kiba tbit bad trei da ka jingkut jingmut ban pynkylla dur ia ka jing khmih lynti jong ki paid bah ka jylla.
Haba kren ha ka jingialang ba shisien shi snem ka Meghalaya Civil Service Officers’ Association (MCSOA) kaba long ha kane ka sngi Saitjain ha Hotel Pine wood, u myntri rangbah u la ong ba  ba ki babu MCS, ki dei kum ki shipai ka sorkar namar ba ki iadei bad iajan bha bad ka synshar ka khadar bad kiba iakynduh ia ki jingeh ba bun ban wanrah ia ka jingkylla bad ka roi ka par ha ka jylla. U la ong ba ki kam bad ki prokram ka sorkar ki shaniah tylli ha ki ophisar  ban pyniaid ia ki khnang ba kin long kiba jop.
U myntri rangbah u la ban ruh ia ka jingdon kam ban ioh ia ka jinghi kai kaba paka jong ki babu sorkar khnang ban pynlah ia ka jingpyniaid ia ki kam ki jam ha ka rukom kaba jop bad kaba larkam.  ”Ngi dei ban long kiba shemphang ha baroh ki liang naduh ki myntri sorkar bad ki babu sorkar”, la ong u Dr Sangma.
Ki don haduh mynta 178 ngut ki babu sorkar MCS  ha ka jylla.
Shwa ia kane, u Chief Secretary u Bah P B O Warjri u la ong ba ka synshar ka khadar ka long kaba donkam ban shim ia ki rai kiba biang bad kiba shisha kiba long katkum ki ain.  U la ong ba ka seng jong kiba babu MCS ka dei u budlum jong ka sorkar ban shim ia ka jingkitkhlieh kaba biang ban pyniaid ia ki kam ki jam khlem kano kano ka jingshah shiliang. U la pynpaw ia ka jingsngew kmen ha kaba ki don ruh bun ki kynthei kiba pas MCS bad kane ka pyni ba ki kynthei ki long kiba tbit ban shimti ia ka kam synshar khadar.