Ki nongwei ki dei ki nongwei, ym dei ban kdup tang namar ka niam: KSU-JHDU

Jowai: Haba pyrshah ia ka CAB kaba la mynjur mynta da ka sorkar NDA hapoh ka jingialam u Narendra Modi, ka Khasi Students’ Union (KSU), Jaintia Hills District Unit (JHDU) ka la kyntu ia ki paidbah ka bri u hynniewtrep hynniew skum ban ieng tylli kumba kiwei pat ki jaitbynriew ka jylla North East ki la ieng pyrshah ia ka.

“Ka Sorkar u Modi kam dei ban kdup ia ki bar-ri ne ki nongwei tang namar ka niam ba ki long rit paid ha Bangladesh, Afghanistan bad Pakistan. Ki Nongwei te ki Nongwei ngim lah ban pdiang ia ki. Kam kor ka Niam ia ka jaitbynriew, ka jaitbynriew ha khmat sa wan ka niam”, la ong uwei na ki nongialam ka KSU ha ri lum Jaintia u ma SS Niangti.

“Ngi na ka liang ka KSU-JHDU ngi ai ka jingkyrshan kaba pura ia ka KSU Sengkmie bad kumjuh ia ka NESO halor ka jingieng pyrshah ia ka CAB”, u la bynrap.
Utei u nongialam ka KSU, u la ong ba ka thain North East ka long kaba don ka jingma kaba khraw halor ka CAB namar kane ka Bill kan pynioh ia ka lad ka kabu kaba khraw ia ki Khar Hindu na Bangladesh ban wan buhai Shnong sha kane ka thain.
U la ong ba ki bun ki jylla hapoh ka ri India kiba la pyrshah ia katei ka ain Iakjakor, ngi ha ryngkat kiwei pat ki jylla ka North East kiba don 8 tylli kynthup ia ka Sikkim ngi dei ban ieng tylli ban pyrshah ia katei ka CAB ka sorkar jong u Modi.