Shillong, 16 Jylliew:
Ha ka 16 tarik u iaiong, 2015 kawei ka briew kaba kyrteng ka kong Sweety Nongkhlaw ka la ialeh sertiphiket sngi kha napoh ka tnad Municipal Board, hynrei ka la shim por haduh 11 sngi ba kan ioh ia katei ka sertiphiket kata ka la ioh haduh ka 27 tarik u iaiong, 2015, wat la ha ka sertiphiket jong ka, la pyni ba la pyndep ia baroh ki kam bad la ai sertiphiket ia ka da u Senior Medical & Health Officer Gr I Registrar of Birth & Death, Shillong Medical Board tang shisngi hadien ba la aplai kata ha ka 17 tarik u iaiong. La pyni ia katei ka sertiphiket da u bah Disparsing Rani uba la wad jingtip lyngba ka ain wad jingtip paidbah, balei ba la pynslem ban ai ia katei ka sertiphiket na ka Municipal, haba ka la paw shai ba tang shisngi lah ban pyndep ia ki kam.
Haba jubab ia katei ka jingwad jingtip utei u Rangbah u Public Information Officer katei ka tnad u la ai jubab ba ka daw ka jingpynslem ka dei namar ba don ki por ba ki kor kompiwtor bad ki Printer ka ophis kim long, na kata ka daw ka lah ban slem. Sa kawei pat ka daw ba katei ka tnad ka la pyni ka dei ba ka don tang marwei u ophisar uba peit na bynta ka sertiphiket sngi kha bad sngi iap bad lada jia ba utei u ophisar u pep trei kan slem ka jingai sertiphiket.
Shuh shuh la jubab ba ha ka sngi saitjain bad sngi u Blei kam dei ka sngi longtrei, bad nalor kata ha kaba iadei bad ka jingpynslem ia ka sertiphiket jong ka Sweety la jubab ba ha ka 18, 19, 25 bad 26 tarik u Iaiong kam dei ka sngi longtrei, dei na katei ka daw la jubab ba ki nongtrei katei ka ophis ki ju phah wan ia ki briew shi taiew hadien ba ki la aplai.
Ute u rangbah u la pan jingtip ruh balei ba ka ophis ka jaka ai sertiphiket ha ka ophis ka Municipal ka plie haduh 11:30 baje mynstep ha ka 27 tarik u iaiong kaba u lap da la ka jong ka khmat, la ai jubab ba ha kaba iadei bad katei ka kam la pan jingshai na ki nongtrei balei ki plie katta por bad yn pynshitom ia ki. Shuh shuh u bah Disparsing Rani u la ong ba katei ka tnad ka la kam, ba ki don saw tylli ki jaka (Counter) ba peit ia ka Sertiphiket katkum ka jubab ba u ioh na katei ka ophis hynrei u la ong ba u lap ba ka don tang kawei ka Counter kaba treikam.
Hadien ba la ioh jingtip lyngba ka ain wad jingtip paidbah, u tei u Rangbah u la kynnoh ba ka daw ka jingslem palat ka Municipal ban ai sertiphiket ia ki paidbah ba leit ban aplai na katei ka ophis ka dei namar ka jingpynslem ki nongtrei bad ka jingleh sting jong ka, namar ba ha ka sertiphiket jong ka Sweety la pyni shai kdar ba u Senior Medical Officer u lah ban pynmih tang ha ka shisngi.
Phi don ban ong eiei?