Ki nongtrei lane ki nongap pang ha Bethany, ki lah ban wan phai sha la iing, ong ka Jaiaw Langsning

Shillong: Ka Dorbar Shnong Jaiaw Langsning ka la shim ia ka rai ba kan nym pyrshah ne khang satia ia kino kino, ki nongshongshnong ba trei hapoh bethany hospital lane ki nongpang ba leit sumar ha kane ka hospital/OPD bad kumjuh ruh ia ki nongleit ap nongpang ne nongleit ai jingbam ia ki nong pang ba kin wan phai sha la iing (Jaiaw Langsning) hadien ba lah dep khmih bniah ia ka koit ka khiah jong ki da ki nongsumar ka sorkar.

Hynrei ka dorbar shnong ka buh ia ki kyndon ba kine ki nongshongshnong kin hap ban bud thik pa thik ia ki jingbthah ka sorkar khamtam eh ba kim bit ban mih na ki iing bad ka Compound ka jong ki da lei lei ruh katba kim pat pyndep ia ka por ba ki hap leh Quarantine. Lada kino kino ki iaid lait ia kine ki kyndon ain ba la buh da ka Sorkar, ka Shnong kam banse ban pyntip sha ki bor ka ain ban leh ia kaba don kam” ong ka kyrwoh na U bah Eldie N Lyngdoh, Secretary, Dorbar Shnong Jaiaw Langsning.