Ki nongtrei kiba leit phai sha iing, ki dei kiba koit ba khiah   

Shillong:U Director ka tnad ka koit ka khiah u Dr Aman War u la kyrpad ia ki paidbah bad ia ki bor pyniaid shnong ban ym pynthut  ia ki nong trei ha ki Hospital baroh.

Haba iakren bad ki lad pathai khubor u Dr War u la ong ba ki don na ki Shnong ki bym shem la shah ia ki briew ki ba trei ha NEIGRIHMS hospital ban rung ha ki Shnong ba ki sah hadien ba ki la wan na jaka trei.

U la ong ruh ba ka NEIGRIHMS hospital, ka dei ka hospital kaba kit khlieh bad  kim ju phah ia ki nongtrei jong ki khlem da pynthikna  bha ia ka koit ka khiah jong ki.

U Dr War u la ong ba lada ki shnong ki thaw kin pynthut, ia ki nongtrei ha NEIGRIHMS hospital yn ym don ban sumar shuh ia ki nongpang, kumta u la kyntu ban ym pynthut ia ki nongtrei ka NEIGRIHMS hospital.

U la ong ruh  ba ym tang ia ki nongtrei ka NEIGRIHMS hospital, hynrei  ia baroh ki nongtrei jong ki hospital ba don ha jylla, namar ba la phah leit ia ki sha ing ka mut ki long ki ba koit ba khiah. 

U la ong ruh ba mynta kaba donkam ka long ban burom ia ki nongtrei jong ka tnad ka koit ka khiah, ki ba ialeh pyrshah bad trei shitom na ka khlam Covid-19.

U myntri ka tnad ka koit ka khiah, u bah Alexander L Hek, u la ong ba ka sorkar bad ki bor ba dei peit ia ka NEIGRIHMS ki ai khublei kyrpang ia ka shong Mawkasiang ka ba la kloi ban pdiang ia ki nongtrei ka NEIGRIHMS ba kin sah hapoh katei ka shnong.