Ki nongtrei ka Robert Hospital ki la leh kyrkieh, ong u Pastor Phawa

Shillong, 16 Risaw:
U Pastor NS Phawa u Senior Administrative Secretary jong ka KJP Assembly  u la ong ba ka jingdawa jong ki nongtrei ka Dr.  Gordon Robert Hospital kumba la paw ha ki lad pathai khubor ban ai ia ka jingpynshai halor ka jingkynnoh ba pyndon kam bakla ia ka pisa da ki bor pyniaid ka Hospital, ka long kaba shu kwah kyrkieh namar ba ka Komiti ba ka Synod ka la thung ban pule bniah ia ka kaiphod halor kane, kam pat dep ia ka kam.
”Ki nongtrei ka Robert Hospital ki la leh kyrkieh, haba ka komiti ka dang leh ia kam kam, ngim pat ioh ia ka kaiphod na ka komiti ba kyrpang ba la thung ban pule bniah ia ka kaiphod ba la phah da ka bor hospital”, la  ong u Pastor Phawa.
Kham mynshwa, ki nongtrei ka Hospital kila buh ia kane ka jingdawa hakhmat jong u Rev NS Phawa, Senior Administrative Secretary jong ka KJP Assembly.
Ka Dr H Gordon Robert Hospital kala paw pyrthei ha ka kam pyndonkam bakla lyngba ka jingpan RTI jong ki katto katne ngut ki Khun Samla jong ka Balang Presbyetrian kiba la sei madan ia ki jingkynnoh pyndonkam bakla ia ka pisa jong ka Hospital da u Medical Superintendent ka Hospital u Dr David Tariang bad u Administrative Officer u Bah KT Rynjah. La kynnoh ruh ba kine ki arngut kila leh ia kane ka kam da kaba pyndonkam bakla ia ka bor ba ki bat ha kane ka Hospital khlem da khein snep ia ka KJP Assembly.
Kine ki samla kila sei madan ia ka shithi bala phah da ka KJPA lyngba u Rev.Dr. J.F. Jyrwa (Administrative Secretary), ha ka 29 tarik u Lber, 2011, kaba pyntip ba ka KJPA ka la rai ban pynkiew ia ka ‘Charge Allowance’ jong u Medical Superintendent (MS) na ka T.14, 000 hajar sha ka T.22, 000, katba ia u Administrative Officer ka long tang T.20, 000 naduh u bnai Lber 2011. Hynrei kine ki arngut kiba khmih ia ka Hospital, kila pynkiew tulop hi dalade ialade khlem ka jingbit na ka KJP Assembly ha kaba la kynnoh ba u Dr David Tariang ula pynkiew iala ka tulop sha ka 1.70 lak tyngka bad u Bah KT Rynjah pat ula pynkiew sha ka 50000 tyngka ha ka shibnai.
La kynnoh ruh ba kine ki arngut kila pynkhein ia ka oskular Memorandum of Association (MOA) bad ia ki Kyndon jong ka Dr H Gordon Roberts Presbyterian Hospital Association (DHGRPHA).