“Ki Nongshongshnong ki dei ban sngewthuh ia la ka jingkitkhlieh”

Jowai, 21 Jylliew:
Ha ka jingiakynduh kaba shisngi halor ka mat Civic and Citizenship and Peer Education kaba la pynlong da ka Society for Urban and Rural Empowerment (SURE) haka hall jong ka dong Banan haka shnong Nongtalang, u nongkren ba hakhmat ha kane ka sngi u Rev. H.H. Mohrmen haka presentation kaba ula ai, ula ong ba ki nongshongshnong ki dei ban sngewthuh ruh iala ka jong ka kamram bad ym ban nang tang ban dawa iala ka jong ka hok. Haka jingkren jong u halor ka phang Civic and Citizenship ula pynkynmaw ba ka jingmut ban tynrai jong ka ktien
phareng citizen ka wan naka ktien Latin kaba mut ka jingitylli jong ki briew hapoh ka nongbah ne ka kynhun. Namar kata ka tynrai jong ka ktien citizen ka dei ka jingiatylli, kaba mut ka jingiatylli na ka bynta kaba bha ka miat jong uba bun balang.
Ka thong jonglang jong ka jinglong ki nongshongshnong kiba bha ka dei ban ialeh ban kynjoh ia ka bha ka miat ka roi ka par jong uba bun ba lang.
Ha kane ka jingialang la iadonglang ruh ki samla pule naka Nongtalang College, ka Martin Luther Christian University; Nontalang centre, ki samla naka Seng Tylli-i-hun ka Nongtalang bad ki samla bad ki nongshongshnong naki dong kiba pher bapher jong ka shnong Nongtalang.
Nalor ka jinghikai halor ka jingmut jong ka jinglong nongshongshnong babha (good citizenship) la ioh ruh iaka jingkren halor ka phang peer education kaba hikai iaki samla kumno ban iaid haka lynti kaba dei wat hapdeng ki jingpynshoi kiba bun haka imlang sahlang khamtam naki paralok lajong iakaba la ai da I kong Leiki Suchiang.Haka jingkren jong u, u Chairman bad Rangbah jong ka dong Banang u ma S. Lyngdoh ula ong ba kane ka dei ka sien kaba nyngkong ba la pynlong ia kum kine prokram hapoh ka shnong ka thaw bad kane ka prokram kaba shisngi kala ai jingmyntoi shikatdei eh khamtam iaki samla. Haka jingkren ban pynwai iaka jingialang u ma S. Phillip Mukhim ula ong ba bunsien la ju pynlong ia ki prokram tang sha sor, hynrei kane ka seng kala pynlong ia kane ka prokram haki Nongkyndong khnang ba ki samla ha nongkyndong ruh kin ioh jingmyntoilang. Ia kane ka prokram la bei pisa daka District Planning Department jong ka West Jaintia Hills District.