Ki nongshong shnong ka Constituency, kim ju mad ka jing kyrduh um kum mynta, ong U bah Paul Lyngdoh

Shillong:Haba kren bad U Rupang u MLA barim ka Shillong West bad u MDC ba mynta ka Jaiaw Mawprem u Bah Paul Lyngdoh u ong ba ka jingrem jong u ha ka ilekshon ba la dep ka wanrah jing myntoi shibun eh ia ka constituency, namar ha ka por ba u dang long u MLA ki paidbah nongshong shnong jong ka konsti twensi jong u kim ju mad satia ia ka jingkyrduh um kumba jia hadien ba u la shah rem noh. “Dei kane ka jingrem jong nga ha ka ilekshon ka pyn kynmaw ia ki paidbah ia baroh ki kam ba u la leh” bad kane ka pynphei phang ia ki, ba “pleng baroh ki kam ba ngi pyrkhat ba ki dei kiba shu jia hi ki dei pynban na ka daw ba u shim khia u Bah Paul kum u MLA”.

Haba kylli la ka jingiapynbeit da ka UDP ba ia ka kam CEM ha KHADC ba yn bhah ba shisnem un bat u Bah Teinwell Dkhar, ar snem u Bah Titos Chyne bad ar snem, u Bah Paul la klet noh namar u President jong ka UDP ha kato ka por u la khlad noh u Bah Paul u la jubab ‘Nga don ka jingngeit kaba skhem ba ka party kan burom bad pyndep ia kane ka kam ha kine ki khydiat sngi bad sa wan, namar kane ka rai kam dei satia ka rai marwei da u Dr Donkupar Roy hynrei da ka party hi baroh kawei’.
Haba phai pat sha ka long ka man ka sain pyrthein ha ka jylla u Bah Paul u la ong ba ka jingdon shibun tylli ki national party kiban iakhun ha ka ilekshon 2023 ka dei ka kabu ksiar ia ki seng riewlum ban wan ha ka bor. Lada ka UDP ha ka por u Bah EK Mawlong ka lah ban ioh 20 ngut tam ki MLA bad ka HSPDP ban ioh 16 ngut ki MLA ha ka por mynshuwa balei kam lah ban long mynta buh jingkylli u Bah Paul. Lada ka BJP ka jop sa tang 2 ngut ki MP ha ki snem 1980 bad ka ioh synshar mynta hato phi pyrkhat kam lah long kumjuh ha ki seng riewlum bynrap shuh shuh u Bah Paul.

Ka jingbym kynthup ka sorkar ia ki District Council ha ka komiti pynbeit pud ka dei ka jingbakla kaba shyrkhei ba ka sorkar ka leh namar dei ka Council ba don ki pud bad ki dulir ban pynskhem ia ka jinglongtrai ia ki jaka puta ong u Bah Paul.
Haba phai pat sha ka jingbym ioh tulop ki nonghikai u Bah Paul u la ong ba kane ka dei beit na kiba bun ki daw bad u ong ban lait na kane ka donkam ka jingpynkylla bad pynjanai ia baroh kawei ka Education Department kaba la lymbrum lymbram mynta. “Nga sngewlehrain palat ban iohi ba ka iingbishar kan hap da ai da ka hukum ba tyngeh ia ka sorkar ha kaba iadei bad ka kam tih bad khaii be-ain ia u dewiong” ong shuh shuh u Bah Paul.

Haba kylli la un dang neh bad ka UDP ne un iakhun noh na kiwei pat ki seng u Bah Paul u la jubab ba ka por kan batai ban kan long ka jingbiej ruh lada iathuh lupa ha u ban iakhun pyrshah ia ki buit bad ki rukom iakhun ban ioh ia ka jingjop.