Ki nongrep bad ka Agriculture policy

Da U Bah Philip Marwein

80 na ka 100 jong ki nongshongshnong jong ka jylla ki dei ki nongrep bad ha ka por ilekshon ruh 80 na ka 100 jong ki nongthepvote ki dei ki nongrep. Kane ka mut ba 48 ngut na ki MLA jong ka jylla ki dei kiba la sei lane la pynjop da ki nongrep. Lada phai ha ka ioh ka kot jong ka jylla ruh 80 na ka 100 jong ka ioh ka kot jong ka jylla ka dei kaba mih na ka ioh ka kot jong ki nongrep. Kumta, ngi lah ban ong da kaba shai kdar ba ka rep ka riang ka dei u budlum jong ka ioh ka kot jong ka jylla. Hynrei, haba khmih bniah bha ia ka jingim bad ka jinglong jingman jong ki nongrep ka long kaba sangsot bad la shah kyntait bein ha ka imlang sahlang ha ka jylla Meghalaya. Ngim lah ban len ia ka jingshisha ba ha ka jylla Meghalaya kiba im pahuh pahai bad kiba ioh mon kynjai ki dei ki nongtrei sorkar, ki kontraktor, ki supplier, ki nongtrei business bad ki nongseng karkhana hynrei ki Nongrep ki dei kiba shah lehbein tam shisha ha ka imlangsahlang. Laitnoh tang katto katne ki nongrep kiba don pahuh ka kyndew ka shyiap bad kiba la khie spah bad kiba la biang ka jingdon jingem, hynrei kiba kham bun na ki nongrep (80 na ka 100 na ki nongrep) ki long kiba duk lane ki dang tlot ha ka kamai kajih bad shisha katba nang rep nang syrdep. Bun na ki nongrep kim don khyndew lajong hynrei ki shu rep wai ha ka khyndew jong kiwei bad ki hab ban siew da ka dor kaba rem bha ia ki trai khyndew. Kham bunsien ha kaba kut jong ka snem ka jingrep jong ki, kam da mih satia tang ia ka bai wai ruh. Bun napdeng ki nongrep ki, long ruh ha kajuh ka por, ki nongbylla sngi ha kajuh ka por.
Namarkata, ka sorkar ka dei ban thaw noh mardor ia ka Agriculture Policy na ka bynta ban khmih ia ka bha ka miat jong ki nongrep bad jong ka rep ka riang.
Ka sorkar India bad ka sorkar Meghalaya ruh ki ju ai ia ki song jingiarap ban kyntiew ia ka rep ka riang. Ban da khein ia ka peisa ba la pynlut baroh shi katta ka la poi da ki phew hajar klur. Hooid, ka la don ka jingiarap ban kyntiew khyndiat kynsoit ia ka rep ka riang hynrei kumno re kumno ka jingim bad ka jinglong jingman jong ki nongrep kam kylla ne kan da kiew satia. Ka jingkiew ha ka ioh ka kot kam kylla bad ki don ruh kiba ka ioh ka kot ka nang randien pynban. Ki nongrep jong ngi ki rep beit thik tang ia u phan, u kba, riewhadem, ki jhur ki jhep, u pathaw, sohkhia bad ki soh ki pai katkum ka jingiadei ka khyndew bad katkum ki aiom hynrei katba nang rep nang syrdep. Ka khyndew bad ka suinbneng ka la nang dkhaw bad ringswai, ka jingseisoh jong ki jingthung jingtep kam long shuh. La donkam da ki buit thymmai ha ka rukom rep rukom riang ban dup kiew ka rep hynrei mano kein ban ai ia ki buit thymmai. Dei halor kane ka nongrim ba la donkam ban don ka Policy kaba hai bha na ka bynta ka rep ka riang lane ka Agriculture Policy. Ki don ki jait jingthung kiba mynshuwa ki long ki mar khlaw hynrei katba nang mih ki por kine ki markhlaw ki la kylla long ki mar-rep kum u Sohmrit, Synsar, Latyrpad bad kiwei kiwei ki mar ba la kylla ki mar-rep. Ia kine kiei kiei ruh la donkam da ka policy. Hooid, ka Policy kam lah ban leh lut ia kiei kiei baroh hynrei kan iarap shibun ha kiba bun ki bynta na ka bynta ban kyntiew ia ka rep ka riang.