Ki nongpang na Civil, ki leit eksamin sha ki hospital shimet

Shillong, 11 Jylliew: Ki dkhot ka liangpyr shah mynta ka sngi Balang ki la takrain ia ka sorkar ba kam lah ban pynbiang ia ki tiar ha Shillong Civil Hospital ban ai jingsumar ia ki nongpang bad bun sien haba ki nongpang ki leit ban shah sumar, la phah eksamin sha ki hospital shimet. Hynrei na ka liang u myntri ka koit ka khiah u Bah AL Hek u la iasaid nia da kaba ong ba ki nong pang ki leit sha ki jaka sumar shimet ym namar bym biang hynrei namar ba ki kwah shuh shuh ban eksamin.

Katkum ka jingkren jong u MLA ka Mairang u Bah Metbah Lyngdoh, ka X-Ray machine ha Shillong Civil Hospital kam shai namarkata, la phah ia ki nongpang sha ki jaka sumar bym dei sorkar. U Bah Hek u la kubut pat ba ka Shillong Civil Hospital kam lah ban ianujor bad ki jaka sumar shimet. U Bah Hek u la ong ba la don kumba 27 ngut ki doktor specialist ha Shillong Civil Hospital. Shwa ia kane u la ong ruh ba ka jingthut ka rukom treikam ha Civil Hospital Shillong, dei namar ka jingbym biang ka bording, ka um, ka jaka buh pynpjah, acid blood gas (ABG) bad kiwei. U Bah Hek u la ong ba ka sorkar ka la shim ia ki lad ki lynti ban buh ia ka generator ban ai bording khlem pynthut. La iakren ruh bad ka PHE ban pynbiang um khlem jingthut ha kane ka hospital.