Ki nongjngohkai pyrthei kiba na ka jylla Meghalaya, ki la lah ban leit shang pyngngad sha Mawsmai, Sohra naduh ka 16 tarik mynta u bnai Risaw

Shillong: Ka Mawsmai-Nongthymmai Elaka mynta ka sngi ka la pynbna ba la shah ia ki nongwankai kiba na ka jylla ban leit jngoh ia ki jaka ba itynnad jong kane ka shnong naduh ka 16 tarik mynta u bnai.

Ka Mawsmai ka dei ka jaka ba don ka Kshaid Nohsngithiang ba don nam, ka Krem Pubon ba itynnad, ka Thangkharang Park, Eco Park bad ka jaka shang pynngad ba dang plie thymmai ia kaba la tip kum ka Kshaid Khmat Kharai ne ka Double Drive.

Ia kane ka rai ban plie ia kine ki jaka shang pynngad la shim hadien ka jingpynbna da ka Sorkar Jylla ban plie noh ia baroh ki jaka shangkai ha ka jylla naduh ka 16 tarik u Risaw ryngkat da kaba bud ryntih ia ki kyndon ban ym ialum lymbung shi jaka.

Ka Mawsmai-Nongthymmai Elaka ka la kyntu ruh ia ki nongwankai na ka jylla ba kin bat ia ka jingryntih, ban ym ialum lymbung, ban bat ia ka akor burom bad khamtam eh ba kim bit ban bret jaboh jabain, bilor ne plastic ha kine ki jaka shangkai.

Ka la pynbna ruh ba la shah ia ki iingbasa kiba don hapoh ka jylli jong ka shnong kum ki hotel bad guest house ha kane ka jaka ba kin plie noh naduh katei ka sngi khnang ba ki nongwankai kin lah ban sah.