Shillong, 17 Iaiong:
Ka jingwan jong ki nongjngohkai pyrthei sha Sohra kam shym la ai jingmyntoi satia ia ki paidbah ka Sohra hynrei ka long pynban tang ka jingpynjaboh ia ka sawdong sawkun, bad ka daw ka long ba haba ki nongwanjngohkai ki leit sha Sohra kim ju pynlut wat tang shi tyngka ruh ban thied ia ki mar ba la die ki briew hynrei wat ia ka ja ruh ki wanrah nabar.
Kane ka jingkren ka la wan na u MLA ka thain u BahTitosswer Well Chyne ha ka jingialang pynshai paidbah halor ka jingmyntoi na ka kam jngohkai pyrthei ba la pynlong da ka Ultimate Legend Bikers Association (ULBA) ha Khliehshnong Sohra ha kane ka sngi Saitjain.
“Haduh mynta, ngam pat nud ban kam ba ki paidbah ka Sohra ki ioh jingmyntoi na ka kam jngohkai. U nongwan jngoh kai u shu wan sha Sohra bad u siew tang ka bai khyrdop T.15-T.20 lait nangta, ym don eiei ba un pynlut ha Iewbah Sohra ne ban thied ia ki tiar ki tar ne ban sah”, la ong u Bah Chyne.
U Paidbah ka Sohra u im na ka iadie iathied na Iewbah Sohra, na MCCL, na ka tih maw, tih dewiong bad kiwei, ym na ka kam jngohkai pyrthei, la bynrap u MLA ka Sohra.
“Ki nongwan jngohkai pyrthei ki shu wan pynjaboh pynban ban bret plastik, ban bret bilor bad leit phai noh bak, kim ju bam ja, ki shu song ja lypa”, la ong u MLA ka Sohra.
U la ong ba ka la dei ka por ia ki paidbah ka Sohra ban pyrkhat thymmai noh ia kane ka kam ban thaw ia ki lad ki lynti ba ki nongwanjngohkai kiba wan sha Sohra ki dei ban pynlut eiei na ka bynta ka jingmyntoi jong ki paidbah.
U la ong ba mynta ka la don ka jingma ba lada ki paidbah ka Sohra kim shim khia ban nang ban pdiang ia ki nongwanjngohkai pyrthei, ban buh ia ki jaka bam ba ki iahap, ka lah ban poi ka por ba ka Sohra ka la lah ban shah knieh noh ia ka jingpaw nam ha ka Mawlynnong. “U Myntri Rangbah ka jylla u Mukul Sangma u la khot iakren bad ia nga, ha kaba u la ong ba ki paidbah ka Sohra ki dei ban leh eiei ban nang ban pdiang ia ki nongwanjngohkai, namar ba ka Mawlynnong ka lah ban knieh noh ia ka nam jongka”, la ong u Bah Chyne.
U la bynrap, ba ki briew ha Mawlynnong ki dei kiba nang ban pdiang sngewbha ia ki nongwanjngohkai, ki pyni ia ka jinglong ba sngewtynnad bad ka jingtuid jong ki nongwanjngohkai ka jur bha sha Mawlynnong ha kine ki sngi.
Ha kane ka sngi, na ka liang ka ULBA ka la shim ia ka sienjan ban kyntu ia ka sorkar ban buh da ka Kali Tyllai (Cable car) ban kit briew na Noh Kalikai sha Nongriat khnang ban khring ia ki nongwanjngohkai pyrthei.
La ioh ruh ia ka jingkren na u EAC ka Sohra u Bah G Warjri, u Rangbah Shnong Bah B Tariang, u President ka ULBA Bah Seiborlang L Nonglait.
Phi don ban ong eiei?