Ki nongialam thymmai ka Congress Mawsynram, kiba nabar konstitwensi

Shillong, 21 Risaw:
Mynta ka sngi u bah Pynshngaiñ N Syiem , Chief Executive Member ka KHADC bad u MLA ka Mawsynram konstitwensi u la lum jingialang ia ki nongkitkam bad ki dkhot jong ka Mawsynram Block Congress Committee ( MBCC) ha ophis jong u kaba don ha Nongrim Hills, Shillong. Ha katei ka jingialang ki don kumba 200 ngut eiei kiba la wan ban ia shim bynta. Ia katei ka jingialang la pyniaid da u bah P.N Syiem.
Ha katei ka jingialang kitei ki dkhot bad ki nongkitkam jong ka Congress Mawsynram ki la shim ia ka rai ban kheiñ noh ialade kum ki dkhot ba la shah sospon ha ka seng Congress namarba ia u nongialam jong ki la sospon da katei ka seng haduh 3 snem. “Ngi la shim ia ka rai ban khein ialade kum ki dkhot ba la shah sospon kum ka dak ka jingpynrem ia ka seng Congress” ong u bah Banraplang Hynniewta haba kren sha ki nongthohkhubor. U la ong ba katei ka seng ka la pynduh pyndam ia ka MBCC khlem da kynjoh ktien ia ki nongkitkam jong katei ka seng ha Mawsynram.
Shuh shuh u la ong ba ka jingthung ia u bah Khelor Kharnaior kum u President ka MBCC ka dei kaba la leh khlem ka jingtiplang jong ki nongtrei shitrhem ka seng Congress ha katei ka konstitwensi kiba la pynjop ar samoi lynter ia u bah Pynshngaiñ N Syiem na ka seng Congress. U la kynnoh ruh ba kiba bun ki nongkitkam bad ki nongialam jong ka MBCC ba mynta ki dei ki briew kiba nabar jong ka konstitwensi. Ki nongialam barim jong ka MBCC ki la pynpaw shai sha ki nongthohkhubor ba kin ieng beit triang ha ka nongrim jong ki kata ban bud ha ka lynti kaba u bah Pynshngaiñ un ialam ia ki. “Aiba un ia khun kum u kyrtong shimet ne na kano kano ka sengsaiñpyrthei bym dei Congress, hynrei ngin pynthikna pat ba u dei ban ioh ia ka jingjop ha u 2018” ong u bah Banraplang Hynniewta.