Ki nongialam Kristan, rangbah Sengkhasi sha ka jingialang Lum jingtep

Shillong, 13 Jymmang: Da ki phewngut ki rangbah nongialam na ki balang Kristan bapher bapher bad kumjuh ruh na ki rangbah Seng Khasi kilaleit ban ia shim bynta ha ka jingialang ka Hima Mylliem kaba la long mynta ka sngi ha Ing Dorbar Hima Mylliem ban ia kren ia ka phang kaba ia dei bad ka jingai lum jingtep ha khlaw Mawroh bad khlaw Mawpat.
Katkum ka rejistar ba ki la soi kyrteng ki don haduh 42 ngut ki nongialam niam hynrei nalor katei da ki phew ngut ki bymioh rung shapoh bad ki ap shabar naba khapngiah palat ka jaka pynlong jingialang.Katkum katei ka rejistar la iohi ba kiba la poi sha katei ka jingialang ki kynthup naduh ki pastor, ki tymmenbasan, ki rangbah Seng Khasi bad ki nongkitkam bapher bapher jong ki.
Katto katne na ki kynhun balang kiba la poi sha katei ka jingialang ki long ka balang Presbyterian,ka balang Katholik, ka balang u Jisu Krist, balang MORFG, balang u Blei, CTC, FGF, RBCF, WWH Church, NTR Church, Balang u Krist, COG, Pioneers Seventh Day Remnant Ministries, Pentecostal Church of God, Christ Deciple Church, United Christian Faith,G.C.C Laban, Seng Khasi Mawlai bad kiwei pat.
Haba ia kren bad u Syiem ryngkat kiba khraw ka Hima Mylliem ki la iathuh ba ka jingkhot mynta ka sngi ia ki nongialam balang ka long lyngba ki kot khubor namarba kim shym la ioh kyrteng ia ki balang kiba ioh lumjingtep ha khlaw mawpat naba kam shym la don ka rikod ha ka Hima bad ka jingkhot ka long tang ban tip kino kino ki balang bad ban kylli na ki la ka jingioh lum jingtep jong ki dei da kaba shu thied ne da ka jingai sngewbha.
U myntri J.Nongkhlaw u la ong ba don ki balang kiba la ioh lum jingtep kumba 10 hajar sq.ft,20 hajar sq.ft bad don ruh kiba la ioh haduh 45 hajar sq.ftkaba mut haduh shi akar bad u la ong ba katkum ka kot ba kipyni ka dei kaba shu ia ai sngewbha katba ha ka jingshisha katkum ka jingiathuh jong ki u la ong ba ka dei ka jingiadie ia thied.
Utei u myntri u la ong ruh ba ka Hima kan sa lum biang ia kawei pat ka jingialang ha kaba yn sap ha jingthoh sha baroh kitei kiba la wan jingialang mynta ka sngi ban ia kren ia katei ka kam namarba kane ka jingkhot mynta ha ka sien ba nyngkong ka long tang ban ithuh ia ki balang kiba la ioh lum jingtep katba ia ka phang ban ia kren sani bha pat yn ia kren ha kawei pat ka jingialang.