Ki nongialam ka sorkar MDA, ki shu kren Danda ha ki lad pathai khubor

Babu Kular Khongjirem

Ha kine ki khyndiat sngi ba la dep, ngi iohi ha ki katto katne ki kot khubor khasi ba u nongialam jong ka sorkar MDA u shu kren danda(biria) ia ki lad pathai khubor halor ka Mawmluh Cherra Cement Limited(MCCL) ba ka dei ka karkhana kaba la dep iap swai bad u virus u la don lypa hapoh katei ka karkhana wat shwa ban wan u Covid-19 ruh.

Ka dei ruh ka karkhana kaba la pymkit ram ia ka sorkar.Hynrei, haba u CEM ka KHADC, i bah TW Chyne uba dei ruh u MDC ka Sohra constituency u la iakren bad utei u nongialam ka sorkar MDA, pynban utei u nongialam ka sorkar Meghalaya u la phla shai kdar ba u shu kren kai ia ki nongthoh khubor.

Ka jingmlien ban kren kai bad kren danda ha ki kot khubor ka ialam bakla ia ki paidbah baroh.Ki kot khubor ki khlem thoh ne report shai pat khnang ba ngin tip mangi ki nong pule ba ki shu thoh ia kaba thok ne ia kaba shu danda. Ka jingkren danda, ka jingkren biria ia ki kam shisha ki pynlong kam kai lut ia ki kam kiba khia bad ba donkam jong ka state,namar shisien ba la shah thok ki nongthoh khubor, ki paidbah ruh ki shah thok lang. Kaba mlien ban thok ia ki nongthoh khubor ka pynshong per bad long sting haduh katta katta ia kino kino ki nongialam paidbah. Baroh ki jingkren mynshwa ne ha ki por kiban wan yn nym lah shuh ban ngeit ne shaniah ioh ki shu kren kai bad shu danda pynban.

Mano ba lah ban tip,kano ka khubor thok bad kano pat kaba shisha? Shwa ban ia jied ia u MP candidate sha Rajya Sabha ruh,ki juh ki nongialam ki shu danda bad kren kai ha ki lad pathai khubor, hana,ba ki long serious ban long candidate MP sha Rajya Sabha.

Tang shi sngi ar sngi ba la thoh ne report ki kot khubor, ki juh ki nongialam ki leit phla sop sop sha la ki nongkyrshan ka constituency ba ki shu thok ia ki nongthoh kot khubor.Ha ka por ba canvas election MLA lei, ki shu kren danda ban pynlong ia baroh ki shnong ka thain ri War kum ki model village ha Meghalaya.Ka thain ri War kan ioh noh ia ki skul bad college kiba biang tam bad bha tam ha Meghalaya. Kumba shiphew snem tam ei ei,nga la pynleit jingmut bha ha kata ka por babki ai jingkren ha ka jingpyni riti-dustur ha shnong Wahkhen, kijuh ki nongialam ki la phla shai kdar ba kin pynlong noh ia ka shnong Wahkhen kum ka Laitumkhrah ka thain ri War.Shait la thap kti ki paidbah bapli da ka jing kmen bad shong shit khlem sngewthuh ia ka jingkren danda pynban.Yn nai iakren shuh ki jingkren danda ba lai phew jait bym lah pynkut shuh ba ki la bun palat thoh. Hynrei,kaba kham shep tieng bad sngew ma eh ka long ba,ioh kum kine ki jingmlien ban kren danda kan long kam kai pynban ia ki isue ba donkam kiba ktah ia ka state Meghalaya hi baroh kawei.

Ka High Level Committee(HLC)jong ka issue them Mator ioh dei pynban tang ka kam danda ha ki nongthoh khubor.Ka ILP bad Meghalaya Resident Safety Act, ki entry bad exit point kin kylla danda lang baroh. Ki paidbah kim tip shuh mynta kano ka shu kren danda bad kano pat kaba shisha.