Ki nongialam ba shisha kim ju kren palat pud, ki pyni bad ai jingmut haba don jingduna, ong u MDC Mawhati

Nongpoh: U Bah Charles Marngar, MDC Mawhati, u la pynpaw ia ka jingsngewkhia kaba jur haba iohi ba ka la don ka jingia kawang ktieh kaba jur hapdeng ka nongialam jong kawei ka kynhun bad u Myntri ka sorkar jylla.

Na ka jingkren utei u MDC Mawhati, watla um shym la kren pyrshah ia ka kyrteng ki briew, hynrei la sngewthuh ba ka jingthmu jong katei ka jingkren jong u, ka dei hadien ba u la iohi ia ka thma ktien ne ka jingiakynthoh kaba markylliang hapdeng ka Kong Angela Rngad, President ka Thma U Rangli (TUR) bad u Bah Prestone Tyngsong, Symbud Myntri Rangbah ka sorkar jylla.

“Ha kaba kum kane ka por, ba ka jingpang COVID-19 ka la sar naphang bad kaba la wanrah jingeh ia kiba bun ki longiing, khamtam eh ia kito ki longiing baduk, kiba im ban pyndap ia ka iing ka sem da kaba bylla mynsngi bad bam da miet, ha ka jingshisha kum ki nongialam kim dei ban shu im-sngi ha ka ban iakynthoh uwei ia uwei pat, hynrei ki dei ban iapyni jingmutlang haba don ki jingduna hangne hangtai, na ka bynta ban weng ia ka jingeh kaba la kynduh da ki paidbah ha ka jylla” ong u Bah Charles Marngar.

Utei u MDC Mawhati, u la pynpaw ia ka jingsngewkhia ban iohi ia ka thma ktien kaba la mih hapdeng ka Kong Angela Rngad bad u Bah Prestone Tyngsong, namar ha ka jaka ba kin iatai bad ai jingmut ba kumno ki leh ia kaba bha tam na bynta ki paidbah ha ka jylla, hynrei kumba long mynta la iohi ba ka la don ka jingiakawang ktieh kaba markylliang tang hapdeng para maki, pynban ka jingeh pat yn sa mad da ki paidbah.

Namarkata, kum u MDC bad u nongmihkhmat barit eh, nga kyntu ia kitei ki nongialam bad nongsynshar ha ka sorkar jylla, ba kin sangeh noh ia katei ka kam kawang ktieh hapdeng para maki, hynrei ki dei ban long kiba pynsngewrit ialade bad ban ia ai jingmut kaba markylliang haba don ki jingduna hangne hangtai, khnang ba kan long ka jingmyntoi na ka bynta ki paidbah ha ka jylla hi baroh kawei.