Ki nonghikai SSA ha Meghalaya, ym dei ba thung ka sorkar, ong u Dr Laloo

Shillong, 17 Lber:
U Symbud Myn tri Rangbah ka jylla ba peit ia ka tnad pule puthi u Dr RC Laloo u la ong ba ki nonghikai skul SSA ha kane ka jylla kim dei satia kiba thung da ka sorkar jylla hynrei dei kiba thung da ki bor skul shimet da ka kontrak bad namar kata, kim dei ki nonghikai ba pura ka sorkar ban siew ha ka tulop kaba heh.
Haba jubab ia ka mat ba la wanrah da u MLA ka Mawshynrut Bah Witting Mawsor mynta ka sngi hapoh ka iing dorbar,  u Dr Laloo u la ong ba “Ia ki nonghikai skul SSA ha kane ka jylla la thung da ki School Managing Committee bad ym da ka sorkar”.
U la ong, “Ha kiwei ki jylla ia ki nonghikai la thung da ka sorkar bad ki dei kiba la pyndep ia ki kyrdan ba biang bad ka jingtbit. Kiba hikai LP Skul ki dei ban pyndep ia ka HSSLC ryngkat ka mark ym duna ia ka 45 percent, bad namarkata, ka tulop kaba siew da ka sorkar ka long kaba heh”, la ong u Dr Laloo bad bynrap, ba hangne ha jylla Meghalaya ruh, ka tulop jong ki nonghikai LP skul kiba thung da ka sorkar kam dei kaba rit kaba long T. 22 hajar eiei ha ka shi bnai.
U la ong ba ki nonghikai ki dei ban pyndep ia ka jingialeh ia ka State eligibility Test kaba long katkum ka kyndon ba la buh da ka sorkar na ka bynta ki nonghikai.
Shwa ia kane, na ka liang u Bah Mawsor u la ong ba ha kiwei ki jylla kane ka thain, ka tulop jong ki nonghikai skul SSA ka la long kaba heh bha bad u la wanrah ia ka nuska kum ha jylla Sikkim ki ioh T. 40 hajar ki nonghikai SSA LP bad T. 48 hajar UP, ha Arunachal Pradesh ki ioh T. 21 hajar LP,  T.26 hajar UP, Manipur T.29 LP, T.31 UP, Mizoram T.20 LP, T.25 UP, Assam T.24 LP, T. 26 UP, Tripura T. 19 LP, T. 23 UP.
Katba ha kane ka jylla Meghalaya ki ioh tang T. 9 hajar LP bad T. 9 hajar shiteng UP. U la kyntu ba ka sorkar ka dei ban peit bad ban pyrkhat ia ki nonghikai da kaba pynkiew ia ka tulop jongki kumba long lem kiwei ki jylla.