Shillong: U Executive Member (EM) ka KHADC u bah Victor Ranee u la pyndonkam da ki nia kiba tyrha bha ia ki nongtrei ka tnad Khlaw ka Council, kiba ju bynshet ia ka kam, kum ki nongap khlaw ne Forest Guard.
Haba jubab ia ka jingkylli, ba la wanrah u MDC ka Mylliem bah Ronnie V Lyngdoh hapoh ka iing dorbar mynta ka sngi, u bah Victor u la ong, “Ka la don ka jingtip sha nga ba ki don ki nongap khlaw (Forest Guards) ka Council, ki bym ju leit trei hynrei ki shu wan sei tulop da kut bnai”.
U Bah Victor u la byrthen ba un leh da kaba tyngeh ia ki nongtrei ki bym kit khia ia ka kam da kaba pynshitom katkum ka ain.
Ha kajuh ka por, u la iathuh ba ka Council ka la don ka jingthmu ban buh noh ia ka jaka sara ding ne Nursery na ka bynta ka Council ha ki khlaw jongka, shi bynta ban pynroi ia ki khlaw bad ban long ruh ka lad ban die ia ki sha ki briew.
U la pyntip ruh ba ka Council ka dang pyniaid ia ka kam thungkam lyngba ka working plan ha ka bynta ka West Khasi Hills naduh 2005 haduh 2010 na ka bynta ban pynjyrngam biang ia ki khlaw. U la ong ba ka jingai skhim ka jingthung dieng ka long ha ki jaka jong kito ki briew kiba la rejister ialade ha ka KHADC.
Phi don ban ong eiei?