Ki nong shong khappud, kim ioh khaw reshon, kim ioh bylla 100 sngi, ong ka KSUP7T

Shillong:Ki Dkhot jong ka Sur u Paidbah ka Bri U Hynniewtrep, myn hynnin ka sngi ki la ia kynduh ia u myntri rangbah ka jylla u Conrad K Sangma, ban iakren halor ki jingeh kaba ngat ha ki nongshong shnong ha ki thain khappud na daw ba ym pat lah ban pynbeit ia u pud u sam ha pdeng ka jylla Assam bad ka Jylla Meghalaya.

Haba iakren bad ki lad pathai khubor na ka liang u Eugenestar Kurkalang General Secretary ka KSUP7T, u la iathuh ba ki nongshong shong kiba sah ha ka thain khappud ki don ha ka jingeh kaba khraw, namar ba kim ioh ia u khaw ration, kim don ia ka jingbylla 100 sngi, kim don skul bad surok ba bha, ha kaba ki don hapdeng ka jingeh ka ba khraw.

U la iathuh ba ha kane ka jingiakynduh la iakren halor ka jingeh jong ki nongshong shnong ha Block I,II,ha Khanapara, ha Nongwah Mawtamur,ka Nongkhlaw bad Langpih.

U la iathuh ruh ba don ki jaka ki ba la jah noh na ka jylla Meghalaya kum ka elaka Labang nong phyllut kaba haduh u snem 2000 ka dang don bad ka jylla, ynrei mynta kane ka elaka ka la jah noh bad mynta ka sngi la ioh ban ia kren ban wad ka lad ka lynti ban wanrah biang ia kane ka elaka sha ka jylla.

Ha kaba ia dei bad ka Nongwah Mawtamur, kaba hap hapoh ka Hima Sohiong, hynrei bun na kine ki jaka ha kane ka thain ki la jah lut na ka jylla Meghalaya.Ki la iakren ruh halor ka Langpih bad Ratacherra.

U bah Rasting Thabah Chairman ka KSUP7T u la iathuh ba ha kane ka jingia kynduh ka seng ka la ai jingmut ia ka sorkar ba ka dei ban buh ia ki kyrteng jong ka shnong ki ba don ka jingia ka jia ha ka website jong ka sorkar jylla.
U la ong “Kumba la pynpaw da ka sorkar ba ka ki 12 tylli ki shong ki dei ki ba don ka jingiakajia kumta ngi la ai jingmut ia ka sorkar ba ka dei ban buh ia kine ki kyrteng ha ki website namar ba tang ha poh block 1 ruh ki don haduh 31 tylli ki shnong ki ba hap hapoh ka Labang Nongpynlut Daloiship. Ki la ai jingmut ruh halor ban pynlong ia ka dorbar kyrpang ban thaw da ka Meghalaya Boundary Commitee bad kyntu ruh na ka sorkar ban pyllait pisa T1 klur na ka bynta ban wanrah kam pynroi ha ki thain khappud.