Ki nong Mumbai ki ju ong ba ki lain rel, ki dei ki lain jingim jong ki

Ki nong Mumbai ki ju ong ba ki lain rel, ki dei ki lain jingim jong ki. Hangne ruh ka wah Umiam bad ka jingkieng dam, ki dei ki jingim jong ka jylla. Kane ka wan hakhmat duh ba ka sorkar ka dei ban shim khia noh kloi, namar ym lah ban tip ba ka dang khlain ne em, khamtam lada wan u jumai ba jur.

Bun tylli ki dam ha kiwei ki Ri, ki pra kynsan kynsan. Ka Ri jong ngi ka mad ia kum kine ki jingjia ba sngewsih ha ki snem ba lah leit. Dang shen ha Uttarakhand ha u snem 2021, kaba ishyrkhei bha. Mynta ka don ka Act kaba thymmai bad ba pyrkhing bha ba tip kum ka Dam Safety Act, 2021. Lah dei ban shna noh da kawei ka dam kham sha trai ia kaba ka don mynta, khnang ban ioh pynlang kham bun ka um. Khlem bor ding, lah kut ka jingim, hap shong ha ka jingdum, baroh ki karkhana kin khang lut, ka pule puthi, ka rep ka riang, ka koit ka khiah bad kumta ter ter kin hiar lut. Ki jingtei ba ka sorkar ka thmu, kum ka ropeway kin pulom lut, bad ym don shuh ba kwah ban wan sha ka ri jingdum.

Lada dei ban shim da ka ram ruh biang beit, ym don ban kynthoh na ka bynta ka bha ka miat, bad khlem pep ka Sorkar Kmie, kan kyrshan beit, namar ka ruh ka don ka jingkitkhlieh. Ka election bad ka bam smai ki MLA bad myntri ki la kut, namar kata ym donkam shuh ban duwai lait noh ka Sohiong. To baroh ngin ia duwai naduh ka dohnud ba U Blei Un don ryngkat bad kane ka Sorkar, ba kan lah ban pyndep ia kiei kiei baroh, bad ba Un iada ia ngi na ki jimgma kiba ngim lah ban iohi.

MR. D.PAKYNTEIN