“Ki nong Mawsynram, kiba ioh thied jaka ha Police Bazar”

Shillong, 19 Jylliew:
U bah H.Shang pliang, Director ka DIPR u la ong ba ka shnong Mawsynram ka dei ka shnong kaba paw nam bha naduh ka por jong ka East Pakistan kaba la dei mynta ka Bangladesh. U la ong ruh ka Mawsynram ka dei ka shnong kaba pawnam ha ka jingjur slap. U bah Shangpliang u la ong ruh ba ka Mawsynram ka dei ka shnong kaba la noh synñiang bha ia ka jaitbynriew ha kaba ha ka kad khaii ba heh duh ha ka jylla kata ka Police Bazar, dei tang ki nong Mawsynram napdeng baroh ki Khasi kiba ioh thied jaka bad kiba long trai ia ki jaka hangtei.
U la ai jingmut ba ka long kaba donkam ia ki nong Mawsynram kiba sah ha sor Shillong bad kiba sah ha shnong ba kin don ka jingiakynduh kaba na ka por sha ka por ban wanrah ia ka jingithuh ithaw para shnong bad ban kyntiew ia ka roi ka par ka bha ka miat hapoh ka thaiñ.
Ia kitei u bah Shangpliang u la kren ha ka jingiakynduh lang ki nong Mawsynram kaba la long mynhynin ka sngi ba la khot da ka All Mawsynram Socio-Cultural Association, Shillong Unit tang ki nongshong shnong ka shnong Mawsynram kiba sah ha Shillong kaba la long ha Land mark Hotel, Nongrim Hills, Laitumkhrah.
Ha kane ka sngi katei ka seng ka la pynkup burom ia ki nong Mawsynram kiba la sah sha Shillong kiba kynthup ia ki doktor, ki engineer, ki ophisar bad ki nongtrei ha ka imlang ka sahlang kiba la kyntiew ia ka jylla baroh kawei. Ha kane ka sngi u Bah HM Shangpliang, u la long kum u Kongsan ban sam ia ki khusnam. Ka jingialang ka long kaba iphuh iphieng ka dei namar ki nongmawsynram ki la poi palat spah ngut kynthup naduh ki longkmie ki longkpa, ki samla bad ki hep kiba rit kiba kynthup naduh kiba wan pule, kiba wan bylla, kiba treikam sorkar, treikam lajong bad kiwei de.