Ki ngap ki la iap lut bad sma iewtung ar tylli ki shnong

Shillong: Ka long kaei kaei ka ba sngew phylla, na ka bynta ki shnong kiba hapoh ka Mawthadrashain Block, kaba don ha West khasi hills District ha kaba ki nongshong shnong kine ki thain khamtam ha Umthlied Lawkasoin bad ka shnong Mawkhan, ha kba ki lap ba ki ngap kiba ki ri ki la lut khlem da tip na kaei ka daw bad ka ne ka jing iap kine ki ngap ka la wan rah ia ka jingsma iewtung kaba shyrkhei.

U Bah Jodi Syiemlieh uwei na ki nongri ngap u ba na ka shnong Umthied Lawkasoin, u la iathuh ba mynta u bnai la shem ba ki ngap kiba la ri ha ki ksing ki la iap baroh hynniew ksing bad kane ka jingiap jong ki ngap, kam dei tang ki ngap ki ba u ri ma u, hynrei baroh ki ba ri ngap hapoh ka shnong ruh ki ngap ki la shu iap lut khlem tip ka daw.

U Bah Jodi u la iathuh ruh ba ki ngap ki ba iap kim dei satia tang ha kane ka shnong, hynrei wat ha ki shnong kiba markhap kum ka shnong Mawkhan ruh la shem ba ki ngap ki la iap lut.

U Bah Syiemlieh u la iathuh ruh ba ki ngap ki ba ki shait ri ha ki snem kiba la dep ki ju iap hi, hynrei ka jingiap ka long tang shi shi ksing bad kata ruh lada ka phet noh ka kiaw ngap ne ka iap noh ka kiaw ngap, hynrei kam ktah eiei ia kiwei pat ki ksing ngap. U bah Jodi u dei u ba la dep ban shah pyntbit, ha kane ka kam ri ngap bad u la ioh jingiarap ruh na ka sorkar na ka bynta ki ksing ngap bad ki don ruh ki ba u la shna hi.

Halor ka ne ka jingjia kaei kaba u kwah ban sngewthuh ka long hato kane ka jingiap jong ki ngap kan ktah ne em ia ki briew lada ki bor sorkar ki lah ban peit lem ban lap ia ka daw jong ka jingiap ki ngap ha kine ki thain.